بوگون "چهارشنبه" فراه ولایتی کینگش اعضالری و مدنی فعال‌لریدن بیرقطاری، هرات شهریده خبری بیر ییغین اوتکزیب مرکزی حکومت نینگ دقت‌سیزلیگی‌دن تنقید قیلگن‌لر.
فراه ولایتی کینگش اورین باسری شاه‌محمود نعیمی نینگ ایتیشیچه، کرونا ویروسی‌گه شبهه‌لی 75 واقعه تشخیص قیلینیش اوچون 10 کون آلدین هرات آزمایشگاهی‌گه یوباریلگن، بیراق اولردن 50 ته‌سی نینگ نتیجه‌سی حاضرگه‌قدر بیللی بولمه‌گن.
جناب نعیمی نینگ تاکید قیلیشیچه، فراه ولایتی هم هرات ولایتی کبی کرونا تهدیدی بیلن روپه‌ره دیر، بیراق اوشبو ولایتده کرونا ویروسی‌گه قرشی کورهشیش خصوصیده مرکزی حکومت تامانیدن یالغیز 20 میلیون افغانی اختصاص بیریلگن.
شونینگدیک، فراه مدنی فعال‌لریدن بیری فرید هیبت نینگ کرونا ویروسی‌گه قرشی کورهشیش اوچون ییترلیچه امکانیت یوق‌لیگیدن تنقید قیلیب ایتیشیچه، فراه ولایتی بوییچه ساغلیق‌نی سقلش ریاستیده هیچ‌قنده‌ی امکانیت یوق و مرکزی حکومت هم بوتوغریده دقت قیلمه‌یدی.
بیراق، هرات ولایتی بوییچه ساغلیق‌نی سقلش ریاستی سوزلاوچیسی محمدرفیق شیرزی نینگ ایتیشیچه، هراتده قوشنی بولگن ولایت‌لر اینقسه فراه ولایتیدن کیلگن شبهه‌لی واقعه‌لرنی تیکشیریش اوچون سعی و حرکت قیله‌دیلر.
اونینگ ایتیشیچه، تیکشیریش‌دن اوتکزیلگن نتیجه نینگ اعلان قیلینیشی مرحله‌سیده فراه ولایتیدن یوباریلگن شبهه‌لی واقعه‌لرنینگ نتیجه‌سی هم اعلان قیلینگن؛ بیراق هراتده شبهه‌لی واقعه‌لر کوپ بولگنی باعث، اوشبو ولایتده بولگن شبهه‌لی واقعه‌لردن کوپراغی‌نی تشخیص قیلیش‌گه مجبور دیرلر.
