د فرانسې فوټبال ملي او هسپانوي کلپ ریال ماډریډ لوبډلې پخوانی لوبغاړی مسلمان ۴۳ کلن زین الدین زیدان د ۵۵ کلن رفال بینیټز په ځای ونیوه.
زیدان د ریال ماډریډ کلب مشر فلارنیټینو پریز له خوا ددې لوبډلې د نوي مشر په توګه په دنده وګومارل شو او پخوانی مشر رفال بینیټیس یې له دندې وشاړه.
د یادونې وړ ده، چې رفال بینیټیز د نیږدی ۷ میاشتو له پاره د ریال ماډریډ فوټبال لوبډلې د روزنې په مشري په غاړه لرله چې مالمو لوبډلې ته ۸ د ۰ ګولونو په وړاندې او ریال والیکانو لوبډلې ته ۱۲ د ۲ ګولونو په وړاندې ماتې د ریال ماډریډ په ګټه د دغه روزونکي سترې بریاوې وې.
که څه هم د رفال بینیټیز د شړلو لامل تراوسه نه دی اعلان شوی خو ویل کیږي، چې دتیرکال په نومبر میاشت کې په خپل کوربتوب بارسلونا ته د ریال ماډریډ ۴ د ۰ په وړاندې ماته خوړل او د کریسټیانو رونالډو سره خړې پړې اړیکي ښایي د رفال بینیټیز د شړلو مهم لاملونه وي.
د بینیټیز په روزنه کې ریال ماډریډ ټولټال ۲۵ سیالۍ ترسره کړي چی په ۱۷ کې یې بریاوې خپلې کړي او په ۳ لوبو کې لوبډله له ماتې سره مخ شوه.
دغه راز د بینیټیز په روزنه کې ریال ماډریډ په وروستیو ۵ سیالیو کې ټولټال ۲۵ ګولونه ترسره کړل، خو د کلب مشر پیریز اعتماد یې ترلاسه نه کړای شو.
د ریال ماډریډ کلب مشر فلارنټینو پیریز له خوا رفال بینیټیز د داسې یو بل مشر زیدان له پاره له دندې ګوښه کیږ، چې څو کلونه وړاندې د همدې کلب له پاره لوبیده او په نړیواله کچه د روزنې کومه ځانګړې تجربه هم نه لري.
د رفال بینیټیز وړاندې د ریال ماډریډ فوټبال کلب مشر فلارنټینیو د دې کلب د تاریخ ترټولو کامیابه روزونکي کارلو انسیلوټي هم په حیرانوونکې توګه له دندې لرې کړی و.
د ریال ماډریډ فوټبال لوبډلې د مشر روزونکي او منیجر دندې ترلاسه کولو وروسته زین الدین زیدان رسنیو سره په خبرو کې ویلي دي، چې د خپل زړه او روح څخه به د ریال ماډریډ د بریاوو له پاره خپله دنده پرمخ یوسي او هیلمن دی بریالي اوسي.
د ویلو ده، چې درفال بینیټیز په روزنه کې بیګا شپه ریال ماډریډ د هسپانیې په لالیګا سیالیو کې د ولنسیا لوبډلې سره لوبه ترسره کړه، چې په دوه دوه ګولونو برابره پای ته ورسیده.
اوسمهال د هسپانیې په روانو لالیګا سیالیو کې ریال ماډریډ لوبډله له لومړي مقام اټلاټیکو ماډریډ څخه ۴ خو له بارسلونا څخه بیا ۲ امتیازه وروسته درېیم مقام له ځان سره لري.
فرانسوی زین الدین زیدان د ریال ماډریډ کلب د اوسني مشر فلارنټینیو په ۱۲ کلنه مشرۍ کې ۱۱ م روزونکې دی، چې په دنده ګومارل کیږي.
