مملکت مستقللیگی نینگ 100 ییللیگیدن نشانلش عرهفهسیده، فاریاب مرکزی میمنه شهری نینگ شهرداری مذکور شهرنینگ شهردارلیک پارکیده افغانستان سابق پادشاهی امانالله خان نینگ صورتی چیزیلگن منار قوریش گه قرار قیلگن.
بیراق میمنه بلدیهسی نینگ اوشبو قراری فاریاب یشاوچیلری نینگ جدی عکسالعملی گه روپهرو بولدی. فاریاب ولایتی نینگ قطار یشاوچیلری اجتماعی ترماقلرده بیر کمپاین یولگه قوییب و بلدیه نینگ قراری گه قرشیلیک بیلدیرگنلر.
اعتراضچیلردن قطاری امانالله خان نینگ صورتی اورنیده مملکت تانیقلی نقاشلریدن بیری غلاممحمد میمنگی نینگ صورتی چیزیلیشی نی سورهگنلر و شونینگدیک باشقه بیر قطاری باشقه آزادیخواه کیشیلرنینگ صورتی نصب ایتیلیشی نی طلب قیلگنلر.
فاریاب خبرچیلریدن بیری خالمحمد مبارز فیسبوک صحیفهسیده یازیشیچه، «فاریاب اهالیسی منار قوریلیشی گه توسیق ایمس دیر، بلکیم امانالله خان نینگ صورتی چیزیلیشی گه قرشی دیر.»
شونینگدیک صدارت ایشلاوچیلریدن بیری بشر یعقوبی، میمنه شهرداریدن ارگ گه خوش خدمتلیک قیلیشدن قول تارتیشی نی سورهگن و اونگه کوره، بو ایش میمنه بلدیهسی و اونینگ ایشلاوچیلری اوچون شرملی دیر.
سلاموطندارگه صحبت بیرگن فاریاب بیلیم یورتی اوقیتوچیسی اشرف شریفی نینگ ایتیشیچه، مستقللیک مناریده امانالله خان نینگ صورتی چیزیلیشی نی یمان کیلهجگی بولیشی ممکن و شو یوزهدن میمنه بلدیهسی بو آلگن قراری گه اوزگریش کیلتیریشی کیرهک.
عین حالده، بیلیم یورت اوقیتوچیلریدن باشقه بیری حسامالدین نینگ ایتیشیچه، میمنه بلدیهسی مستقللیک مناری نی غلاممحمد میمنگی مدنی جمغرمهسیده یانیده قوریش اوچون قرار قیلگن کیم بو منار اوچون توغری بیر ییر ایمس دیر. اونگه کوره، مستقللیک مناری باشقه بیر ییرده قوریلیشی کیرهک.
بیراق میمنه شهرداری جاوید کیوان سلاموطندار بیلن اوتکزگن صحبتیده، امانالله خان صورتی بیلن بیزهلگن مستقللیک مناری قوریلیشی اوستیگه اورغولب ایتیشیچه، اوشبو منار قوریلیشی اوچون مرکزی حکومتدن بویروغ کیلگن و اولر مذکور بویروغ اساسیده ایش قیلهدیلر.
مذکور ولایت محلی رسمیلر فاریاب یشاوچیلری گه قرشی اوشبو منار قوریلشیدن خورسندلیک بیلدیرگنلر. فاریاب حاکمی اورینباسری مقیم راسخ میمنه شهرداری تامانیدن یازیلگن پُست نینگ قوییسیده، بیر کمنت یازیب اوشبو اقدام نی تقدیر گه سزاواردیب و شونینگ شهردار گه تقدیرنامه بیریشی نی سورهگن.
شوندهی بیرحالده، مستقللیک مناریده امانالله خان نینگ صورتی چیزیلیشی توغریسیده بولگن اعتراضلر قییرده ییتیشی حاضرگچه بیللی ایمس.
