فاریاب ولایتی گرزیوان ولسواللیگینینگ سرپرستی عبدالرزاق کاکرنینگ ایتیشیچه، گرزیوان ولسواللیگینینگ ایریم قیشلاقلری سقوط قیلگندن کیین طالبلر برچه امنیتی پوستهلرنی اوز تصرفیگه آلیب، حاضر ولسواللیک بناسی همده امنیه قوماندانلیکنی قورشاووگه آلگنلر.
سلام وطندار بیلن تیلفون آرقهلی صحبت قیلگن جناب کاکر، ولایت مرکزیدن ملی کوچلر اوشبو ولسواللیککه یوباریلمهگن حالده، مذکور تومن طالبلر اشغالیگه اوتیشنی بیلدیرگن.
گرزیوان ولسواللیگی سرپرستیگه کوره، جنگری طالبلر و افغان ملی کوچلری اورتهسیده یوز بیرگن اوروشده طالبلرنینگ 11 نفری هلاک ایتیلیب و 13 نفری ایسه تن جراحتی آلگن. شونینگدیک اونگه کوره، مذکور عملیاتده ملی پولیس نینگ 6 عسکری قربان بولیب و 3 تهسی یرهلنگن.
اما، قوراللی طالبلر مذکور تومننی بوتونلی تصرف ایتگنلیکلرینی ادعا قیلگن.
جناب کاکر، سهشنبه کونی مذکور ولسواللیکنینگ ایریم قیشلاقلری طالبلر تامانیدن تصرف ایتیلگنی بارهسیده خبر بیرگن ایدی.
عین حالده، جناب کاکر، پولیس قوماندانی بولمهگنی همده ییترلی درجهده حربی جهاز یوقلیگی مذکور ولسواللیک قوراللی طالبلر اشغالیگه اوتیشنینگ بیرینچی سببلریدن دیگن.
