فاریاب ولایتینینگ محلی رسمیلری، مذکور ولایت کوهستان تومنی کسلخانهسینی بیش داکتری طالبلر گروهی آرقهلی اوغیرلنگنیدن خبر بیرهدی. ایتیلیشیچه، اوغیرلنگنلردن بیری کسلخانه آمری و باشقه 3 تهسی عیال ایکن.
مذکور تومن باشلیغی امامیار تقوانینگ سلاموطندارگه ایتیشیچه، طالبلر اوتکن کون (شنبه) مذکور داکترلرنینگ میمنه شهریدن کوهستان تومنی کیتهدیگن چاغیده اوغیرلهگن.
کوهستان تومنی باشلیغینینگ ایتیشیچه، مذکور تومن کسلخانهسیدهگی داکترلر «کلینر قبری» دییلهدیگن منطقهده توتقونگه آلینیب و کوهستان تومنی «8- قیشلاغی» طالبلرنینگ مرکزیگه انتقال بیریلگن.
شونینگدیک تقوانینگ ایتیشیچه، اوشبو کسلخانه داکترلرینینگ قوییب یوباریلیشی خصوصیده، مذکور تومن قوم بویوکلری تامانیدن جدی سعی و حرکت بولماقده.
فاریاب کسلخانهسی رسمیلری، کوهستان تومنی کسلخانه ایشچیلرینینگ اورغیرلنگنینی تأیید قیلیب و بو توغریده آرتیقچه معلومات بیریشدن وازکیچگن.
شونینگدیک کوهستان تومنی باشلیغینینگ ایتیشیچه، طالبلر آلتی کوندن بویان، مذکور تومنده مخابراتی ترماغلر آنتنلرینی نظارتگه آلگن. اونگه کوره، طالبلر اعضاسی ایستهگن چاغیده آنتنلرنی فعال قیلهدی و ایستمهگن چاغیده فعال قیلمهیدی.
انه شوندهی ایکی ییل آلدین، فاریاب ولایتی قرمقول تومنیده ایکی عیال داکتر ناتانیش قوراللی کیشیلر تامانیدن اوغیرلنگن ایدی. اوشبو داکترلر کمیده 15 کوندن کیین، اوغیرلاوچیلرنینگ قولیدن قوییب یوباریلدی.
