فاریاب ولایتی‌نینگ دولت‌آباد تومنیده یوز بیرگن سونگی اوروش‌لردن آواره بولگن عبدالرحمان‌نینگ سلام‌وطندارگه ایتیشیچه، هوا ساووق بولگنی و آچلیک باعث، 8 آیلیک باله‌سی جان بیرگن و تورموش اورتاغی هم یمان حالت حیات کیچیره‌دی.
اونینگ کوپه‌یتیریشیچه، حاضر هوا ساووقلیگی و آچیلیک خیمه‌لرده یشه‌یدیگن عایله‌لرنینگ 300 باله‌سینی تهدید قیله‌دی.
فاریاب ولایتی‌نینگ تومن‌لریده یوز بیرگن اوروش‌لردن بدرغه بولگن عایله‌لردن بیرقطاری، ینگی‌لیک‌که جوزجان ولایتی‌نینگ مرکزیده جایلشگن‌لر. اولرنینگ ایتیشیچه، هوا ساووقلیگی، ییگولیک آذیق-آوقت یوقلیگی و باش‌پناه‌سیزلیک کیکسه کیشی‌لر و باله‌لرنی تورلی قیین‌چیلیک‌لرگه چالینتیره‌دی.
اولرگه کوره، حق‌آباد قیشلاغیده جایلشگن عایله‌لرنینگ رقمی 450 گه ییتیشه‌دی.
ینگی دنیاگه کیلگن باله‌لردن بیری‌نینگ آنه‌سی تردی خال گه کوره، باله‌سی ایکی کون آلدین خیمه‌نی آستیده دنیاگه کیلگن و ساووق باله‌سی‌نینگ جانی‌نی آلیشیدن قورقه‌دی.
اونینگ کوپه‌یتیریشیچه، حاضر یمان وضعیت‌ده حیات کیچیره‌دی و تیریک قالیش اوچون هم امکانیت یره‌تیلمه‌گن.
عین حالده، جوزجان حاکمی‌نی سوزلاوچیسی فریدون انیق، حق‌آباد قیشلاغیده باله‌لر جان بیرگنینی رد قیلیب ایتیشیچه، محلی حکومت بدرغه بولگن عایله‌لرگه یاردم ییتکزیش اوچون سعی و حرکت قیلماقده.
باشقه بیر تاماندن جوزجان مدنی فعاللری‌نینگ ایتیشیچه، دولت و یاردم بیرووچی مؤسسه‌لرنینگ دقت‌سیزلیک‌لری شونده‌ی بیر شکلده دوام قیلگن صورتده، انسانی فاجعه یوز بیریشی ممکن.
