فاریاب ولایتیده 12 قیشلاق و 4 پوسته طالبلرنینگ قولیگه سقوط قیلدی. فاریاب امنیتی رسمیلرینینگ ایتیشیچه، چهارشنبه دن پنجشنبه گه اوتر کیچه قوراللی طالبلر فاریاب ولایتینینگ بلچراغ و دولتآباد تومنلریده قیشلاقلر و پوستهلرنی اوستیگه گروهی هجوم اویوشتیرگنلر.
فاریاب پولیسی سوزلاوچیسی عبدالکریم یورشنینگ سلاموطندارگه ایتیشیچه، دولتآباد تومنی اوستیگه طالبلر تامانیدن اویوشتیریلگن هجومده مذکور تومننینگ بیر کیلومترلیگیده کهنهبازار، بازارقلعه، کوسهقلعه، چمن قیشلاق و جرقلعه قیشلاقلریده 4 پوسته طالبلرنینگ نظارتیگه اوتگن.
جناب یورشنینگ ایتیشیچه، قوراللی طالبلر بلچراغ تومنیگه تیگیشلی کمرک، سرسیخ، شورابک، نوآباد، چغاتک و قیرمه قیشلاقلری اوستیگه هم هجوم قیلگنلر و امنیتی کوچلر آرقهگه چیکیلگنلری سبب، مذکور قیشلاقلر طالبلرنینگ قولیگه سقوط قیلگن.
فاریاب پولیسی سوزلاوچیسیگه کوره، دولتآباد تومنیده امنیتی کوچلر و طالبلرنینگ آرهسیده یوز بیرگن آتیشمهده 4 عسکر یرهلنگن و اونلرچه طالب هلاک ایتیلیب و یرهلنتیریلگن.
قوراللی طالبلر تامانیدن میدیاگه یوباریلگن خبرنامهده ایتیلیشیچه، فاریاب ولایتینینگ دولتآباد تومنیده مذکور گروهنینگ منصوری عملیاتی جریانیده 7 پوستهنی نظارتگه آلیب و امنیتی کوچلرگه آغیر زیان ییتکیزگنلر.
باشقه بیر تاماندن بغلانده 7 محلی پولیس و بیر قومندان قوراللی طالبلر تامانیدن اولدیریلگن.
بغلان ولایت کینگشی اعضالریدن بیری آتی فاش ایتیلیشینی ایستمهی سلاموطندارگه ایتیشیچه، بوگون ایرتهلب قوراللی طالبلر پلخمری شهرینینگ حسینخیل منطقهسیده محلی پولیس پوستهلریدن بیرینی اوستیگه هجوم قیلگنلر و ایکی ساعتلیک آتیشمهدن سونگ پوسته طالبلرنینگ قولیگه سقوط قیلگن و بو پوستهنینگ قومندانی باشقه 7 پولیس بیلن هلاک ایتیلگن. اونگه کوره، بو پوسته یاردمچی کوچ ییتیشمهگنی سبب، طالبلرنینگ قولیگه سقوط قیلگن.
قوراللی طالبلرنینگ سوزلاوچیسی ذبیحالله مجاهدنینگ اوز تویتر صحیفهسیده یازیشیچه، بوگون ایرتهلب حسینخیل منطقهسیده محلی پولیس پوستهلریدن بیرینی نظارتگه آلگنلر و کوپینچه حربی جهاز هم بو گروهنینگ قولیگه توشگن، بیراق اوشبو گروهنینگ تلفاتی توغریسیده هیچ نرسه دیمهگن.
لیکن بغلان پولیسی سوزلاوچیسی ذبیحالله شجاع نینگ ایتیشیچه، محلی پولیس پوستهسی اوستیگه طالبلر تامانیدن اویوشتیریلگن هجوم ده پوسته قومندانی باشقه ایکی همراهی بیلن هلاک ایتیلگن و امنیتی کوچلر پوستهنی قیتهدن نظارتگه آلگن. جناب شجاع گه کوره، بو آتیشمهلرده 8 طالب هلاک و باشقه 15 طالب یرهلنگن.
