فاریاب ولایتی‌نینگ امنیتی رسمی‌لری، ناتانیش کیشی‌لر تامانیدن یاش بیر عیال اولدیریلگنی‌دن خبر بیره‌دی. اولرگه کوره، 22 یاشر عاطفه مونوگرافی‌نی ارایه ایتیش نیتی‌ده بیلیم یورت بارگن، بیراق قیته‌یاتگن چاغیده، ناتانیش کیشی‌لر تامانیدن یمان شکلده اولدیریلگن.
مذکور ولایت پشتونکوت تومنی پولیس قومندانی سخیداد عثمانی‌نینگ سلام‌وطندارگه ایتیشیچه، اوشبو عیال‌نینگ جسدی پشتونکوت تومنی‌نینگ آق‌مسجد ناملی منطقه‌سیدن تاپیلگن. عثمانی‌نینگ ایتیشیچه، حاضرگچه بو واقعه سببی بیللی بولمه‌گن، بیراق جسد تیکشیریلیشی اوچون کسلخانه‌گه انتقال بیریلگن و شونینگ‌دیک، اوشبو قضیه عامل‌لری معلوم قیلینیشی توغری‌سیده، تیکشیروو باشلنگن.
عاطفه‌نینگ تورموش اورتاغی محمدهاشم‌نینگ ایتیشیچه، ایرته‌لب اوزی عاطفه‌نی بیلیم یورت ییتکیزگن و تورموش اورتاغی‌نینگ کیشی‌لردن قورقه‌دیگن هیچ بیر ناتوغری حرکتی یوق ایکن.
شونینگ‌دیک، فاریاب ولایتی بشر حقلری کمیسیونی‌نینگ ساحه‌وی دفتری باشلیغی حفیظ‌الله فطرت، بو واقعه‌نی تأیید قیلیب ایتیشیچه، مذکور ولایت‌ده اولر اوتگن هفته جریانیده عیال‌لر قتلی و خودکش‌لیگی خصوصیده، 7 قضیه‌نی رویخطگه آلگن.
جناب فطرت‌گه کوره، ایسلنگن واقعه‌لر دلیلی بیللی ایمس، بیراق خودکش‌لیک‌که قول اورگن‌لردن کوپینچه‌سی، دارو و زهردن فایده‌لنگن.
