اسلامی همکارلیکلر تشکیلاتی افغانستاندهگی برچه اوروش طرفلریدن زوروانلیکلرنی کمهیتیریشلری و تینچلیک تأمینلنیشی توغریسیده سعی و حرکت قیلیشلرینی سورهدی.
اوتگن کون «یکشنبه، 15- سرطان» مذکور تشکیلات تامانیدن نشر قیلینگن اعلامیه ده ایتیلیشیچه، افغانستانده زوروانلیکلر میزانی آشگنی گه علاوه، تینچ اهالی دن هم قربانلیک آلگن و شو یوزهدن ایکی تامان دایمی تینچلیک و آتیشکیسین برقرار ایتیلیشی خصوصیده، دقت قیلیشلری کیرهک.
اسلامی همکارلیکلر تشکیلاتی نینگ باش کاتبی یوسف بن احمد العثیمین، تینچلیک جریانیده وجودگه کیلگن کیلیشمهلرنی خوش قرشیلب و افغانلردن افغانستان گه عاید لایحه آرقهلی افغانستانلیکلرنینگ رهبرلیگی، شرطنامهلر و عالملرنینگ خلق ارا ییغینلرینی اعلامیهلری اساسیده، دایمی تینچلیک و برقرارلیک تأمینلنیشی خصوصیده سعی و حرکت قیلیشلرینی سورهگن.
اسلامی همکارلیکلر تشکیلاتی نینگ باش کاتبی افغانلرنینگ رهبرلیگی ده تینچلیک جریانیدن حمایت قیلیشی گه علاوه امید بیلدیریشیچه، حاضرگی تینچلیک سعی و حرکتلری افغانستانده تینچلیک و برقرارلیک تأمینلنیشی گه سبب بولیشی ممکن.
عین حالده، افغانستان تشقی ایشلر وزیرلیگی، اسلامی همکارلیکلر تشکیلاتی نینگ اعلامیهسینی خوش قرشیلب و اونی افغانستان نینگ تینچلیک جریانیدن حمایت قیلیش گه اونملی دییدی.
ایتیلیشیچه، بوگون «دوشنبه، 16- سرطان» کیچ قورون مملکت باشکینتی کابل خلق ارا تشکیلاتلری و منطقه مملکتلریدن کمیده 20 تهسی نینگ نمایندهلرینی ییغینی گه میزبانلیک قیلیشی خصوصیده قرار قیلینگن.
بو ییغین افغانستان تینچلیگی توغریسیده منطقهیی کیلیشوونی کوچلنتیریش اوچون یولگه قوییلهدی.
شونینگدیک، جاری هفته سهشنبه و پنجشنبه کونلریده باشقه ایکی ییغین چیتایللیک مملکتلرنینگ نمایندهلرینی حضوریده یولگه قوییلیشی ممکن.
