فاریاب ولایتی‌ده بیر پولیس عیال آتیب اولدیریلدی.
حادثه اوتگن کیچه ولایت مرکزی میمنه شهری نینگ تورتینچی ناحیه‌سیده روی بیرگن.
فاریاب ولایتی نینگ امنیتی رسمی‌لری، اولدیریلگن عیال پولیس چرمگر خانه شهری نینگ یشاوچیسی ایکن و شهر امنیتی کمربندیده ساتنمن حیثی‌ده پولیس چارچوبه‌سیده ایشلب کیلماقده ایدی دیگن.
اسمی فاش ایتیلمس‌لیگینی ایسته‌گن امنیتی منبع‌لردن بیری‌نینگ سلام‌وطندارگه ایتیشیچه، نوریه ناملی 40 یاشر پولیس کیاوی جان‌محمد واسطه‌سی بیلن اولدیریلگن.
منبع، قتل علتی عایله‌وی دشمن‌لیکلر دیب بیله‌دی و ایتیشیچه، قاتل حادثه‌دن کیین محلدن قاچیب طالب‌لرگه قوشیلگن.
طالب‌لرهم بو عیال پولیس اولرنینگ نفرلری تامانیدن اولدیریلگن‌لیگی‌نی تأیید قیلگن.
فاریاب پولیس قومندان‌لیگی جنایی بوییچه مدیری جنرال محمدنادر اوشبو عیال کیاوی تامانیدن اوقگه توتیلگن‌لیگینی تأیید قیله‌دی، بیراق بوباره‌ده کوپراق معلومات بیرمیدی.
فاریاب ولایتی‌ده‌گی انسان حق‌لرکمیسیونی باشلیغی سید حفیظ‌الله فطرت‌نینگ ایتیشیچه، بو خانم نینگ کیاوی پولیس اورگه‌تیش مرکزی ملازمی بولگن.
جناب فطرت، فاریاب امنیتی رسمی‌لریدن حادثه عاملینی قولگه آلیب و عدلی و قضایی نهادلرگه تاپشیریشینی طلب قیله‌دی.
فاریاب انسان حق‌لرکمیسیونی نینگ گزارشی‌گه کوره، جاری ییل باشله‌نیشیدن حاضرگه قدر ولایت بویلب 8 عیال اولیمی رویخط‌گه آلینگن که بولردن 4 ته‌سی ناموسی قتل بولگن.
