د فاریاب امنیتي مسوولان د هغې ښځې د جسد موندلو خبر ورکوي چې ۲۰ ورځې وړاندې له خپلې لور سره یوځای ورکه شوې وه.
د فاریاب د امنیې قومانداني ویاند عبدالکریم یورش وايي، یاده ښځه چې ۴۵ کاله عمر لري، ۲۰ ورځې وړاندې له خپلې ۱۸ کلنې لور سره د دغه ولایت له پښتونکوټ ولسوالي نه تښتول شوې وه.
یورش سلاموطندار ته ویلي، پرون یې د یادې ښځې وروست شوی جسد په پښتونکوټ ولسوالي کې موندلی دی. د هغه په وینا، دغه مور او لور د پښتونکوټ ولسوالي د «پشهخانه» سیمې اوسېدونکې دي.
یورش زیاتوي، د یادې مېرمنې لور لا هم ورکه ده او په تړاو یې پلار نیول شوی دی.
تېره اوونۍ په فاریاب کې یوه پلار د خپلې لور له ټوټه ټوټه کولو وروسته د هغې د بدن غړي پر دېوال راځړولي وو او طالبانو هم په دغه ولایت کې یوه نجلۍ وژلې وه او جسد یې په باغ کې غورځولی و.
