د غور ولایتي روغتون رییس جمعهګل یعقوبي سلام وطندار ته وویل چې پهدې ولایت کې د ماشوم ناروغیو متخصصو ډاکترانو نهشتوالی د ناروغیو د زیاتېدو سبب شویدی.
نوموړي زیاته کړه چې دمګړۍ د غور ولایت په مرکزي روغتون کې په بېلابېلو ناروغیو اخته شاوخوا ۱۱۰ ماشومان بستر دي.
د غور ولایت یو شمېر اوسېدونکي هم د ماشوم ناروغیو مختصصو ډاکترانو پر نهشتوالي نیوکې سره وايي چې د ماشوم ناروغیو تشخیص او درملنې لهپاره اړ دي چې نورو ولایتونو او یا هم په لوړ لګښت بهر لاړ شي.
د غور دوه اوسېدونکي عبدالغفور او تیمورشاه وايي چې په غور کې د ماشوم د ناروغیو ډاکټر د نهشتوالي له امله مجبورېږي چې خپل جایداد وپلوري او د درملنې لهپاره نور هېوادونو ته روان شي.
دوی دا هم وايي چې د ډېرو کورنیو ماشومان د پيسو د کمښت له امله مړه شوي هم دي.
د غور عامې روغتیا ریاست ځایناستی عبدالطیف رحیمي وايي چې دا ستونزه یې څو ځلې له عامې روغتیا وزارت سره شریکه کړې؛ خو تراوسه غور ته د ماشوم ناروغیو مختصص ډاکتر نهدی لیږل شوی.
د غور روغتیايي مسوولان وايي چې د ماشومانو ناروغیو متخصصو ډاکترانو نهشتوالي له امله یوازې د غور مرکز فیروزکوه ښار کې ۶۵ ماشومان د سرخکان او سینهوبغل ناروغۍ له امله ژوند بایللی دی.
د غور عامې روغتیا ریاست له عامې روغتیا وزاته غواړي چې ژر تر ژره دا ستونزه ور هواره کړي.
