غور ولایتینینگ مرکزی فیروزکوه شهرینی غورقند منطقهسی مکتبلرینینگ اوقیتووچیلریدن بیرقطاری، آیلیکلری توللنمهگنی باعث، ناراضیلیک بیلدیریب استعفا بیرگنلر.
اوشبو اوقیتووچیلرنینگ ایتیشیچه، 10 آیدن بویان آیلیک آلمهگنلر، شو یوزهدن جمعی شکلده استعفا بیریب و استعفالرینی مذکور ولایتنینگ محلی ادارهسیگه تاپشیرگنلر.
اوقیتووچیلردن ایکی کیشی عبدالسمیع و حاجی خیرالدین متوکلنینگ ایتیشیچه، اولر بو قیینچیلیکنی نیچه مرته ولایت مقامی، ولایتی کینگش و معارف ریاستی بیلن شریک قیلگنلر؛ بیراق حاضرگچه بو توغریده هیچ بیر ایش قیلینمهگن.
اولرنینگ آگاهلنتیریشیچه، آیلیکلری توللنمهگن صورتده، ایرتهدن مکتب گه حاضر بولمهیدیلر. اولرنینگ ایتیشیچه، معارف باشلیغی و ملی خوفسیزلیک آرهسیدهگی سیاسی قرهمه قرشیلیکلر باعث، اوقیتووچیلرنینگ آیلیکلری توللنمهگن.
شونینگدیک، اوشبو موضوع نی تصدیقلگن غور معارف ریاستی سرپرستی خلیلاحمد مبارزنینگ ایتیشیچه، ملی خوفسیزلیک ریاستینینگ سابق باشلیغی تامانیدن بیریلگن گزارشده غورقند منطقهسینینگ مکتبلری مذکور ولایتنینگ ناتینچ منطقهلریده یاپیلگن مکتبلرنی قطاریده ذکر ایتیلگن و بو ایش اوقیتووچیلرنینگ آیلیکلری توللنمهگنی گه سبب بولگن.
مبارزگه کوره، ناتینچ منطقهلر مکتبلرینینگ رویخطی گه بیلمسدن آلینگن تینچ منطقهلرنینگ مکتبلریدن کوپینچهسی فعال دیر.
عین حالده، غور حاکمی غلام ناصر خاضعنینگ ایتیشیچه، اوقیتووچیلرنینگ استعفاسی قبول قیلینمهگن. غور حاکمی گه کوره، اوقیتووچیلرنینگ آیلیکلری توللنیشی توغریسیده سعی و حرکت دوام ایتماقده و بو قیینچیلیک معارف وزیرلیگی بیلن شریک قیلینگن.
اوتگن ییل غور ولایتینینگ ملی خوفسیزلیک ریاستی، مذکور ولایتنینگ ناتینچ منطقهلرینی 113 دن آرتیق مکتبینی نامعلوم دلیل بیلن یاپیق گزارش بیرگن ایکن.
بو توغریده غور ولایتینینگ ملی خوفسیزلیک ریاستی مسؤوللرینینگ فکرینی آلیش اوچون علاقه قوردیک؛ بیراق اولر صحبت بیریشگه حاضر بولمهدی.
ایتیش کیرهک، شونینگدیک نیچه وقت آلدین، غور تومنلرینینگ مکتبلرینی اوقیتووچیلریدن بیرقطاری، آیلیکلر توللنمهگن صورتده، درس بیریشدن وازکیچیشلری توغریسیده آگاهلنتیرگن ایدی.
