جمهورلیک ریاستی سوزلاوچیسی صدیق صدیقی نینگ سلاموطندارگه ایتیشیچه، افغانستان تینچلیک لایحه‌سی بوییچه امریکا تشقی ایشلر وزیرلیگی‌نینگ خاص نماینده‌سی زلمی خلیلزاد، بوگون "چهارشنبه" توشدن آلدین مملکت جمهور رئیسی محمداشرف غنی بیلن اوچره‌شگن. جناب صدیقی‌گه کوره، اوشبو اوچره‌شووده جناب خلیلزاد قطر و پاکستانده قیلگن سفری خصوصیده جمهور رئیس غنی‌گه گزارش بیرگن.
جمهورلیک ریاستی سوزلاوچیسی نینگ کوپه‌یتیریشیچه، آتیش‌کیسین موضوعی تینچلیک تامین‌لنیشی اوچون اساسی بیر بولیم دیر و آتیش‌کیسین بولمه‌گن صورتده، سوزلشوولر نتیجه بیرمه‌یدی.
جناب صدیقی نینگ ایتیشیچه، اوشبو اوچره‌شووده جناب غنی افغانستان اهالیسی و دولتی دایمی تینچلیک ایسته‌یدی دیگن و بوتوغریده سعی و حرکت قیلیشینی بیلدیرگن.
عین‌حالده، عربی میدیالردن بیرقطاری نینگ طالبان رسمی‌لریدن نقل قیلیب ایتیشیچه، آمریکا طالبان گروهی‌دن کیلیشوونامه امضا ایتیلیشیدن آلدین 10 کون‌لیک آتیش‌کیسین اعلان قیلیشینی طلب قیلگن.
طالبان منبع‌لریدن بیری‌نینگ عرب میدیالرگه ایتیشیچه، آمریکا نینگ اوشبو ایستک‌لرینی رهبرلری بیلن شریک قیلگن و نهایی قرارنی اولر آله‌دی.
شونینگدیک، ملی بیرلیک حکومتی نینگ اجرایی ریاستی بیر خبرنامه آرقه‌لی، عبدالله عبدالله نینگ افغانستان تینچلیک لایحه‌سی بوییچه آمریکا خاص نماینده‌سی زلمی خلیلزاد بیلن اوچره‌شگنیدن خبر بیرگن.
خبرنامه‌ده کوپه‌یتیریلیشیچه، اوشبو اوچره‌شووده افغانستان تینچلیک لایحه‌سی بوییچه آمریکا خاص نماینده‌سی زلمی خلیلزاد دوحه و اسلام‌آباد گه قیلگن سفری خصوصیده جناب عبدالله‌گه معلومات بیرگن.
خبرنامه‌ده ایتیلیشیچه، اوشبو اوچره‌شووده ملی بیرلیک حکومتی نینگ اجرایی باشلیغی، تینچلیک تامین‌لنیشینی مملکت یشاوچی‌لری نینگ اساسی ایستک‌لریدن عنوان قیلگن.
