استرالیاده‌گی افغانستانلیک‌لردن یوزلرچه‌سی بوگون جمهور رییس محمد اشرف غنی‌نینگ سفری‌گه قرشی ناراضیلیک نمایش یولگه قویگن‌لر.
استرالیا باشکینتی کانبرا شهریده جایلشگن ملت اویی برابریده توپلنگن اوشبو اعتراضچی‌لر، جمهور رییس غنی استرالیا کوچلری‌نینگ باش قومندانی پیتر کازگرو بیلن اوچره‌شگن بیرچاغده ناراضیلیک نمایش کورستگن‌لر.
اولر، افغانستان دولتی و استرالیا، افغانستانلیک باش پناه ایزلاوچی‌لرنینگ دوسیه‌لرینی تیکشیرسین و باش پناه ایزلاوچی‌لرنی زورغه بو مملکت‌دن چیقارمه‌سین دییدیلر.
سلام‌وطندار بیلن تلیفونی علاقه قورگن اعتراضچی‌لردن بیری کاوه احمدزاده‌نینگ ایتیشیچه، اوشبو ناراضیلیک نمایش‌دن مقصد، افغانستانده عدالت تأمین ایتیلیشی و هزاره‌لر برابریده‌گی کَم سیتیش‌لر و باش پناه ایزلاوچی‌لرگه قرشی ایکی مملکت قراری‌گه نقطه قوییش دیر.
اونگه کوره، اعتراضچی‌لر، باش پناه ایزلاوچی‌لر قیته‌دن مملکت‌گه قیتریلیشی خصوصیده، استرالیا و افغانستان دولت‌لری آرسیده، کیلیشووگه قول قوییلمه‌سینی طلب قیله‌دیلر.
اعتراضچی‌لردن باشقه بیری علی هزاره‌نینگ ایتیشیچه، استرالیا دولتی افغانستان‌گه بیره‌دیگن یاردملری‌نی جدی شکلده نظارت قیلیشی کیره‌ک.
.jpg)
اوشبو اعتراضچی‌لرنینگ کوپه‌یتیریشچه، غنی‌نینگ دولتی افغانستان قیته قوریلیشی و رواجلنیشی خصوصیده، بوتون مملکت یشاوچیلری آره‌سیده تینگ‌لیک‌نی نظرگه آلیب و بوتون مملکت یشاوچیلری‌نی دنیا اینیقسه استرالیا دولتی‌نینگ یاردملریدن خبردار قیلیشی لازم.
بو توغریده جمهورلیک سرایی فکرینی اورگه‌نیش اوچون علاقه قوردیک، بیراق جمهورلیک ریاستی‌نینگ مطبوعات دفتری وقتینچه‌لیک باشلیغی شاه حسین مرتضوی سلام‌وطندار بیلن اوتکزگن صحبتیده، کانبرا اعتراضچی‌لری‌نینگ بیانات‌لری توغریسیده آچیقچه جواب بیرمه‌دی.
اوتگن «یکشنبه» کون کابل‌ده خبری بیر ییغین اوتکزگن جناب مرتضوی‌نینگ ایتیشیچه، جمهور رییس‌نینگ استرالیاگه قیلگن سفری لایحه‌سیده باش پناه ایزلاوچی‌لرنینگ موضوعی کیریتیلمه‌گن.
شونینگ‌دیک، بوندن آلدین، اروپایی مملکت‌لرده افغانستانلیک باش پناه ایزلاوچی‌لر، بو مملکت‌لردن زورغه چیقاریلمس‌لری و کَم سیتیش مسئله‌لری خصوصیده، ناراضیلیک نمایش اوتکزگن ایدیلر.
جمهور رییس غنی، اوتگن «شنبه» کون کیچ قورون، نیچه کونلیک رسمی بیر سفرده استرالیا، اندونیزیا و سنگاپور مملکت‌لریگه کیتدی و اوتگن کون کیچ قورون استرالیانینگ کانبرا شهری‌گه ییتیب باردی. جمهور رییس غنی، مذکور مملکت‌لرنینگ رسمی‌لری بیلن اوتکزگن صحبت‌لریده اقتصاد، سوداگرلیک، ترانزیت و کانلر بولیمی‌ده سرمایه یاتقزیش مسئله‌لرینی بحث‌گه آله‌دی.
