افغان ولسمشر محمد اشرف غني وايي، چې د امنیتي ځواکونو اړوند ارګانونو کې د فساد شتون د دغو سرتېرو د مرګ ژوبلې د زیاتېدا لامل شوی دی.
افغان ولسمشر محمد اشرف غني د دوشنبې پر ورځ د افغان ځواکونود شهیدانو په یاد جوړه شوې غونډه کې د فساد شتون په اړه يې اندیښنه وښوده او زیاته يې کړه، چې د فساد د له منځه وړلو په موخه یې په تېرو شپږو میاشتو کې د ملي دفاع د۷۰۰ کارکونکو دندنې تغیر او تبدل کړې دي، چې زیاترو کسانو یې له ۳ کلنو ډير په دغو دندو کار کاوه.
ولسمشر غني زیاتوي، چې د تدارکاتو بهیر او همدا ډول د امنیتي ځواکونو ټپيانو ته د رسیدنې په برخه کې بنسټيز بدلونونه راغلي دي.
ښاغلی غني په دغو مراسمو کې د امنیتي ځواکونو د شهیدانو ۱۴ کورنیو ته د جوړو شوو کورونو کليګانې وسپارلې او ټينګار يې وکړ، چې د امنیتي او دفاعي ځواکونو کورنیو ته به د سرپناه ویشلو لړۍ دوام و کړي.
د ولسمشر پر وینا، تر راتلونکو درېیو کلنو پورې به د امنیتي ځواکونو د ټولو شهیدانو کورنیو ته کورونه ورکړي.
په همدې حال کې پوځي شنونکی جاوید کوهستانی وایي، چې د ملي دفاع وزارت بیلابیلو برخو کې فساد شته، خو پر وینا يې مالي فساد ډیر پراخ دی او که مخه یی ونه نیول شي شونې ده نړیوالې مرستې ودریږي.
د کوهستاني پر وینا فساد، سلیقوي چلند، له دندې ناوړه ګټه اخیستنه، د غوڅې پرېکړې نشتون او په پر ټولو یو رقم د قانون نهعملي کېدل په ملي دفاع وزارت کې عمده ستونزې دي.
دا په داسې حال کې ده، چې "سیګار" یا په افغانستان کې د امریکا د مرستو د څېړلو ادارې په وار وار راپورونه خپاره کړي و، چې د افغانستان په امنیتي ارګانونو په ځانګړي توګه د ملي دفاع وزارت د تېلو په قراردادونو کې میلیونونه ډالر فساد شوی دی.
