ولسمشر محمد اشرف غني وايي، چې هیڅوک د امنیتي سکتور په چارو او مقرریو کې د مداخلې حق نه لري.
غني ډاډ ورکړ، چې امنیتي او دفاعي ځواکونه به د هېواد او هېوادوالو د دفاع په خاطر په پوره مېړانه او زړورتیا د افغانستان د خلکو د دښمنانو ټول بریدونه او پلانونه شنډ کړي.
محمد اشرف غني، دغه څرګندونې نن یک شنبه (اکټوبر۱۱مه) سهار په ارګ کې د ملي توحید مرکز څخه د ویډیو کنفرانس له لارې د ۲۰۳ تندر قول اردو قوماندان ډګرجنرال محمدشریف یفتلي سره د جنوب ختیځ زون د امنیتي وضعیت په هکله د خبرو په جريان کې وکړې.
د ولسمشرۍ ماڼۍ په رسمي پاڼه کې راغلي، چې ولسمشر غني وروسته د سیمه ییزو ارګانونو ادارې عمومي مشر ته لارښوونه وکړه، چې په ملکي برخه کې د کدرونو په مقرریو کې د شفافیت په خاطر دې معیارونه تطبیق کړي.
په دغه پاڼه کې معيارونو ته اشاره نه ده شوې.
د ارګ له خوا په خپور شوي راپور کې راغلي، چې ولسمشر د هېواد جنوب ختیځ زون کې د امنیت د تامین په برخه کې سیمه ییز پولیس او د دوی فعالیتونه ګټور وبلل او والیانو ته یې لارښوونه وکړه، چې د ملي اردو او ملي پولیسو د لا پیاوړتیا په خاطر دې د جلب او جذب پروسې ته اساسي توجه وشي.
ولسمشر غني په داسې حال کې هیچاته د امنیتي سکتور په چارو او مقرریو کې د مداخلې حق نه ورکوي، چې په دې وروستيو کې په نظام کې دننه د "پنځمې ستنې" د اشخاصو د نفوذ اوازې ګرمې شوي.
په رسنيو کې د ځينو کارپوهانو او تحلیګرانو له خوا وسله والو طالبانو لاس ته د کندوز ولایت سقوط په نظام کې دننه د پنځمې ستنې د اشخاصو د نفوذ نتیجه بولي.
دوی وايي، چې د دولت په لوړو څوکيو کې داسې اشخاص شته، چې هم له دولت سره کار کوي او هم د وسله والو طالبانو پلوي کوي، نو دوی په لوی لاس افغان امنيتي ځواکونه له عملياتو منع کوي او وسله والو سره د معاملې په نتیجه ورته سيمې پريږدي.
