غزنی ولایتی کینگش اعضاسی حسن رضا یوسفی نینگ سلام‌وطندارگه ایتیشیچه، جاغوری تومنی نینگ یولی کمیده 10 کوندن بویان طالبان تامانیدن باغلنگن دیر.
جناب یوسفی‌گه کوره، یول‌لرنینگ باغله‌نیشی آذیق-اوقات بهاسی نینگ یوقاری کیتیشی‌گه سبب بولگن.
غزنی ولایتی کینگش بو اعضاسی نینگ ایتیشیچه، جاری ییل بهار موسومی‌دن حاضرگه‌قدر جاغوری قتناو یولی‌ده 30 گروگه آلیش واقعه یوز بیرگن.
اونینگ ایتیشیچه، سونگی پیت‌لرده مذکور قتناو یول یولاوچی‌لریدن 10 ته‌سی قوراللی کیشی‌لر تامانیدن اوغیرلنگن و اولر سرنوشتی حاضرگه‌قدر بیللی بولمه‌گن.
جناب یوسفی نینگ ملی بیرلیک حکومتی‌دن تنقید قیلیب ایتیشیچه، بو قیین‌چیلیک‌نی حل قیلیش خصوصیده حکومت جدی صورتده سعی و حرکت قیلمه‌گن و بو وضعیت نینگ دوامی قابل قبول ایمس دیر.
جاغوری یشاوچی‌لری نینگ ایتیشیچه، غزنی شهریگه باریش اوچون خطرلی یوللردن اوتیش‌گه مجبور دیرلر.
بیراق، غزنی پولیس قومندانی خالد وردک نینگ ایتیشیچه، امنیتی کوچلر جاغوری- غزنی قتناو یولی خوفسیزلیگی‌نی تامین‌لش اوچون سعی و حرکت قیله‌دی.
بوندن آلدین مالستان، ناوه و اجرستان تومنی یشاوچی‌لری هم طالبان گروهی نینگ باج آلیش‌لریدن تنقید قیلگن ایدیلر.
ایتیلیشیچه، بوندن آلدین جاغوری تومنی نینگ قتناو یولی خوفسیزلیگی‌نی تامین‌لش اوچون قره‌باغ دشتی‌گه نیچه امنیتی پوسته ایجاد ایتیلگن ایدی، بیراق حاضرده مذکور پوسته‌لر کوتاریلگن دیر.
