غزنی شهرینینگ شرقی بولیمیده جایلشگن گذرگاه سخی ناملی زیارتگاه اوتگن کیچه ماین آرقهلی پارتلهتیلگن. اوشبو خبرنی تصدیقلگن غزنی حاکمی سوزلاوچیسی محمدعارف نورینینگ ایتیشیچه، داعش گروهینینگ فکری گه بولگن تشکیلاتلر اوتگن کیچه بو زیارتگاه نی پارتلتگن. اونگه کوره، اوشبو واقعه عامللرینی تاپیش اوچون تدقیقات باشلنگن.
غزنی یشاوچیلریدن کوپینچهسی زیارتگاه بوزیلگنینی داعش گروهی گه نسبت بیرهدیلر؛ بیراق غزنی حاکمی سوزلاوچیسی محمدعارف نوری، غزنی ده داعش گروهی فعالیتینی رد قیلیب سلاموطندارگه ایتیشیچه، شوندهی واقعهلر بوندن آلدین مذکور ولایتنینگ مُقر و قرهباغ تومنلریده هم یوز بیرگن و بو اوچینچی واقعه بولگن.
باشقه تاماندن، غزنی ولایتینینگ مدنیت و معلومات ریاستی باشلیغی بشیر محمدینینگ ایتیشیچه، بو وضعیت دوامی، مذکور ولایتده قوروقچیسی بولمهگن یوزلرچه تاریخی آبده بوزیلیشی توغریسیده اولرنی خواطرگه سالگن. او، ایچکی ایشلر وزیرلیگیدن آبدهلر سقلهنیشی اوچون قوروقچی تعیین ایتیشینی سورهیدی.
غزنی ولایت کینگشی اعضاسی حسن رضا یوسفینینگ ایتیشیچه، بوندهی هجوملر دولت تامانیدن جدی آلینیشی کیرهک. اونگه کوره، داعش و طالبان گروهی اتفاقسیزلیک ایجاد قیلیش اوچون سعی و حرکت قیلهدیلر و ینگی ییل گه قرهگنده، حکومت جدی شکلده امنیتی چاره تدبیر کوریشی لازم.
غزنی ولایتیده دولتگه قرشی نیچه گروه فعالیت قیلهدی؛ بیراق سونگی کونلرده زیارتگاهلر هجوم گه دوچ کیلماقده؛ دیمک ایکی آی دوامیده 3 زیارت هجوم گه دوچ کیلیب بوزیلگن.
گذرگاه سخی زیارتی نوروز کونلریده غزنی یشاوچیلری تفریح قیلهدیگن و نوروز کونلرینی بیرهم توتهدیگن ییرلردن بیری دیر.
