غزنی یشاوچیلریدن بیرقطاری نینگ ادعا قیلیشیچه، جهادی بیر قومندان و نمایندهلر کینگشی اعضالریدن بیری، مینگلرچه جریب ییرلرینی غصب قیلگن.
بوگون «شنبه» ایرتهلب، غزنی ولایتی نینگ نیچه قیشلاغی یشاوچیلریدن اونلرچهسی، مذکور ولایت نینگ پولیس قومندانلیگی برابریده ناراضیلیک بیر نمایش یولگه قوییب ایتیشیچه، جهادی قومندانلردن بیری میراحمد کوچی و اوغلی نمایندهلر کینگشی نینگ اعضاسی ننگیالی لونگ، اولرنینگ مینگلرچه جریب شخصی ییرلرینی غصب قیلیشگن و پولیس هم اولردن حمایت قیلهدی.
اعتراضچیلر بیر ورق نی حجت صفتیده میدیالرگه کورسهتیب ایتیشیچه، مذکور جهادی قومندان و اوغلی تامانیدن غصب ایتیلگن ییرلر، محکمه قراری اساسیده، خشیک، قلعۀ آمو و قلعۀ کوچی قیشلاقلری یشاوچلری نینگ ملکیتی حسابلنهدی.
بیراق، نمایندهلر کینگشی ده کوچیلرنینگ نمایندهسی و میراحمد کوچی نینگ اوغلی ننگیالی لونگ، بو اعتراضلرنی اوزیگه قرشی دسیسه دیب و بونینگ ایلدیزلری قبیله ایچیدهگی مسئلهلرگه باغلیق دییدی.
جناب لونگ نینگ ادعا قیلیشیچه، بو ییرلر آتهسی نینگ ملکیتی دیر و بو توغریده بولگن ایشانچلی حجت و گواهینامهلرنی غزنی ولایتی نینگ محلی ادارهلری بیلن شریک قیلگن.
عین حالده، غزنی پولیس قومندانلیگی نینگ سوزلاوچیسی، ییر غصب قیلووچیلر پولیس تامانیدن حمایت قیلینگنینی رد قیلیب و ایتیشیچه، بوتون حرکتلری مملکت قانونلری و پولیس وظیفه سیگه عاید قاعدهلر اساسیده بولگن.
