غزنی ولایتینینگ یشاووچیلر، ولایتی کینگش ادارهسی نینگ میدانیده ییریک ییغین اوتکزیب، عمومی یوللرده امنیت تامین قیلینیشی، اوغیرلنگن 31 یولاووچی آزاد ایتیلیشی، غزنی شهریده ایچکی ترورلر آلدی آلینیشی، فسادگه قرشی کورهشیش و دولت اداره لریدهگی کارشکنلیکلر اونگی آلینشینی سورهگنلر.
اعتراضچیلردن بیرتهسی سمیه منتازنینگ سلام وطندارگه گپیریشیچه، مرکزی حکومت عمومی ترانسپورت یوللری ینه اهالینینگ جانی خوفسیزلیگی تامین ایتیلیشی اوچون عملده آدیم کوتاریشی بارهسیده تاکیدلهگن.
خانم منتازگه کوره، 31 مسافر اوغیرلهنیشی اوچون غزنی اهالیسی حادثهنی قاره لب، دولتدن اوغیرلنگنلر تیزلیکده آزاد ایتیلیشینی سورهگنلر.
شونینگدیک اعتراضچیلر ولایت سرپرستی موسیخان اکبرزاده نینگ قیلمیشینی تنقید آستیگه آلیب، اونی ایش دن آلینیب، محکمه ایتیلیشینی طلب قیلگنلر. ییغینده سوزگه چیققنلردن غرنی اهالیسی نینگ نمایندهلر مجلسیدهگی اعضاسی علی اکبری قاسمی، مرکزی دولتدن غزنیدهگی نابرقرارلیکلرگه ییتیشیشنی سورهگن.
قاسمینینگ سوزلریگه قرهگنده، دولت اعتراضچیلر ایستهگینی انابتگه آلمهگن حالده، کیلهجکده بوندن کوره ییریک نمایشلرگه قول اورش ممکن.
نمایندهلر مجلسینینگ اوشبو اعضاسی، اوغیرلنگن 31 مسافر اوچون دولتنینگ موفقینی تنقید آستیگه آلیب، نا تینچلیکلر افغانستان خلقی اوچون شرایطنی جوده قتیقلشتیرگن لیگی خصوصیده تاکیدلهگن.
شونینگدیک قاسمی، مملکتنینگ حاضرگی احوالی خلق اوچون تن آلینمیدیگن بیر وضعیت بولگن لیگینی ایتگن. اهالی هر کون اوغیرلنهدی، انتحاری هجومده قربان بولهدی. عین حالده، ولایت سرپرستی موسیخان اکبرزاده نینگ سلام وطندارگه بیلدیریشیچه، اعتراضچیلرنینگ کوپچیلیگی اوز سوزلریده مبالغه قیلهدیلر. ولایت مرکزی همده خیابانلریده نابرقرارلیکلرنی تن آلگن ولایت سرپرستی، وضعیت اوتگن ییلگه نسبتن ایجابی اوزگرگن لیگینی ادعا قیلگن.
باشقه تاماندن ولایتنینگ مدنی جماعهچیلیک فعاللریدن حمیده گلستانی، 31 یولاووچی اوغیرلنگن لیگی اوچون دولتنی تنقید قیلیب، ایریم شخصلر مسالهنی سیاسی سوء استعمال قیلیشلرینی بیلدیرگن.
خانم گلستانینینگ سلام وطندارگه ایتیشیچه، مرکزی دولت قوراللی طالبلرنینگ ایریم بلند مرتبهلی رسمیلرینی تورمهلردن آزاد قیلگن بیر پیتده، مملکتده اوروش تامانلری اورتهسیده المشتیریش مدنیتی رواجلندی.
31 مسافر اوغیرلنگن لیگیگه عکسالعمل بیلدیریبلیب، ایچکی و تشقی مملکتلرده ییریک ناراضیلیک نمایشلر اوتکزیلدی. مذکور یولاووچیلر تخمینن بوندن ایکّی آی آلدین زابل ولایتینینگ شاهجوی ولسواللیگیده نقاب بیلن یوزی بیکلنگن نامعلوم شخصلر طرفیدن اوغیرلهنیب کیتیلدی.
غزنی مملکتنینگ نابرقرار ولایتلری جملهسیدن. اوتگن کون مذکور ولایتنینگ قرهباغ ولسواللیگیده یوز بیرگن پارتلش عاقبتیده 12 کیشی تینچ اهالی حیاتدن کوز یومدی.
