د غزني امنيې قومندانۍ په يوه خپره کړې خبرپاڼه کې ويلي چې طالبانو ۳ ملکي کسان او ۲ پوليس اول په ډزو وژلي او بيا يې جسدونه په بېرحمۍ په يوه موټر کې سوځولي دي.
دا پېښه تېره ورځ د ياد ولايت جغتو ولسوالۍ قياق دره کې شوې ده.
خبرپاڼه کې راغلي چې ياد ملکي کسان د مالستان ولسوالۍ اوسېدونکي وو او پوليس د رشيدان ولسوالۍ د امنيې قومندانۍ سرتېري وو.
خبرپاڼې زياته کړې چې ياد وژل شوي کسان په يوه سراچه ډوله موټر کې غزني ښار ته روان وو.
طالبانو تر اوسه پورې په دې اړه رسنيو ته څه نه دي ويلي.
