د غزني ولایتي شورا مرستیال او د برمته شویو مسافرینو د را آزادولو لپاره د خبرو اترو د ډلګۍ سرپرست عبدالجامع جامع وايي، چې د ۳۱ برمته شويو مسافرینو راخوشې کېدل؛ د پاکستان (ای. اېس. آی) پوره تړاو لري.
هغه په دې باور دی، چې پاکستاني استخبارات په افغانستان کې د خپلو موخو د ترلاسه کولو او د سولې په خبرو اترو کې د زیاتو امتیازاتو د اخیستلو لپاره، د مسافرینو خوشې کول له یوې ورځې بل ورځې ته ځنډوي.
جامع زیاتوي:" له مقابل لوري سره خبرې اترې روانې دي، او تر اوسه څو ځلې د زابل او غزني د قومي مشرانو جرګې، کویټې او پېښور ته تللي دي."
خو ښاغلي جامع مشخصه نه کړه، چې د دغو مسافرینو د خوشې کولو په مقابل کې وسله وال څه غوښتنې لرلې.
د غزني د ولایتي شورا رییس خالق داد اکبري هم د ۳۱ مسافرینو برمته کول د پاکستان کار بولي او وايي، چې د هغه هیواد استخبارات هڅه کوي، چې د افغانستان د قومونو ترمنځ درز او اختلاف پیدا کړي.
د غزني ولایت د سولې عالي شورا هم په دغه قضیه کې پاکستان په لاس لرلو تورنوي.
د غزني ولایت د سولې د عالي شورا غړي مدیر شېر خان سلام وطندار ته وویل، " د ۳۱ تښتول شویو مسافرینو د راخوشې کولو موضوغ په ځنډولو کې مهم رول لري او د دوی رول له تصوره لېرې نه دی."
خو د غزني مرستیال والي محمد علي احمدي وايي، تر اوسه دولت او قومي مشرانو د برمته شویو مسافرینو د راخلاصولو په اړه کوم ګټور کار نه دی کړی.
د غزني مرسیتال والي، د دې موضوع په اړه د پاکستان پر کړنو تبصره ونه کړه، خو وویل: هر خبر چې په رسنیو کې خپريږي سهي نه دي او حقیقت نه لري.
دغه۳۱ مسافر څه باندې يوه مياشت وړاندې د کابل – کندهار پر لويه لاره د وسله والو له خوا له موټره ښکته کړای شول؛ خو تر اوسه ېې د برخه ليک په اړه کره معلومات نشته.
