د مدني ټولنې مجتمع مسوولان وايي، د غزني قرهباغ ولسوالۍ د نېختې او شېراباد کلیو اوسیدونکیو ترمنځ د اوبو پرسر راپورته شوې لانجې حل لهپاره لېږل شويو پلاوو د پاموړ لاسته راوړنې نهلرلې.
د دوی په خبره، د نېختې او شېراباد کلیو استوګنو ترمنځ د اوبو موجوده تاریخي او حقوقي دعوه حقوقي حل لاره او سیاسي درایت غواړي؛ خو په سیمه کې د قانون حاکمیت کمزورۍ غچ اخیستو او یرغمل نیونو ته زمینه برابره کړې ده.
د مدني ټولنو د اعلامیې پربنسټ، د دواړو کلیو اوسیدونکیو ترمنځ اختلاف هغه مهال رامنځته شو چې د شېراباد کلي یو اوسېدونکی د اوبو ګرځي لهپاره نېختې کلي ته تللی و چې هلته ویالې ته ولوېد او ومړ. په لومړي سر کې د دواړو ولسوالیو اوسېدونکیو منلې وه چې دا یوه اتفاقي پېښه وه خو له څه موده وروسته ځینو کسانو دې مسلې ته قومي رنګ ورکړ.
د افغانستان د مدني ټولنې شبکې رییس نعیم نظري په اعلامیه کې وویل د دې لانجې په سر کې د نېختې ۱۲ اوسېدونکي یرغمل نیول شوي وو، چې څلور تنه يې د پیسو په ورکولو سره راخوشې او دوه نور يې د شکنجې له امله وژل شوي وو.
د اعلامیې پربنسټ له شاوخوا یوې اوونۍ راهیسې د چونې، ماشي، نواباد بازار، قرهچه، جمال او میرګ کلیو اوسیدونکي په کورني بند کې ژوند کوي.
د مدني ټولنې غړی علي فکور وايي حکومت غزني ته دویم پلاوی هم لېږلی و، خو د لانجې حل پر ځای يې هغه دوه سیمهییز پولیس چې د اذوقې نهشتوالي له امله یې پوستې پرېښې وې له یو ملکي وکړي سره د لاسته راوړنې په توګه کابل ته راوستلي دي.
خو د کورنیو چارو وزارت مرستیال ویاند نصرت رحیمي سلاموطندار ته وویل د کورنیو چارو وزارت لوړ پوړی پلاوی له درې ورځو مذاکراتو وروسته هوکړې ته رسېدلی او د نېختې او شېراباد کلیو اوسېدونکي به هم د دې ستوزې دایمې حل په موخه خبرې وکړي.
د ښاغلي رحیمي په وینا، د دغو لانجو زیاتولو په تور دوه کسان نیول شوي او نور عاملین به يې هم ونیول شي.
د مدني ټولنې بنسټونو له حکومته وغوښتل چې د هېواد نافذه قوانینو پربنسټ د دواړو لوریو غوښتنې وڅېړي او ژرترژره دې دغه ستونزه حل کړي.
