هرات امنیتی رسمی‌لریدن بیری‌نینگ ایتیشیچه، اولکه غرب حوزه‌سی عالملرکینگشی‌نینگ باشلیغی مولوی خداداد صالح قوروقچی‌لری و پولیس کوچلری تامانیدن هرات شهریده ایکی تینچ اهالینی آتیب اولدیریلگن.
بو آتی فاش بولیشینی ایستمه‌گن امنیتی مقام‌نینگ ایتیشیچه، مولوی خداداد قوروقچی‌لری بیر کرولا نوعی‌گه بولگن موترگه شبهه قیلیش‌لری بیلن اونگه قرشی اوق اوزه‌دیلر.
هرات ولایت سوزلاوچیسی احسان‌الله حیات نینگ ایتیشیچه، حادثه گه عیبله‌نیب بو مولوی نینگ 5 قوروقچیسی قوشیمچه 4 پولیس قیدگه آلینگن.
جناب حیات‌نینگ بیلدیریشیچه، حادثه اوتگن کیچه ساعت 8 لرده بیرکرولا نوعی‌گه بولگن موتر مولوی خداداد قوروقچی‌لری‌نینگ موتری بیلن توقنه‌شیب کیتگن بیرچاغده روی بیرگن. ایتیلیشیچه، اولکه غرب حوزه‌سی نینگ عالملرکینگش باشلیغی اویی تامان کیتماقده ایکن.
اونینگ ایتیشیچه، مولوی خداداد قوروقچی‌لری و پولیس کوچلری محلدن قاچماقچی بولگن موترگه قرشی اوق اوزگنلر.
هرات والیسی‌نینگ سوزلاوچیسی، بومولوی قوروقچی‌لری و پولیس کوچلری نینگ اوق اوزیشلری باعث کرولا موتریده‌گی یولاوچیلر ایکیسی هم هلاک بولگن دیب کوپه‌یتیره‌دی. جناب حیات‌نینگ بیلدیریشیچه، هلاک بولگن‌لر تینچ اهالی ایکن و موترلریده قیسی شبهه‌لی نرسه هم کورینمه‌گن.
هرات حوزه‌یی کسل‌خانه سی‌نینگ سوزلاوچیسی محمدرفیق شیرزی‌نینگ ایتیشیچه، بو کیشیلردن بیری یره‌لنگن حالده کیلتیریلماقده ایکن ولی یولده جانینی قولدن بیرگن.
ینه بیر تاماندن، هرات ولایتی دفتری تیزلیک‌ده قضیه تیکشیریلیشی اوچون بیرهیأت توظیف بولیشینی بیلدیرگن.
مولوی خداداد صالح هرات شهریده‌گی شهرتلی و نفوذلی ملالردن بیری دیر.
