نورالحق علومی‌نینگ ایتیشیچه، ایچکی ایشلر وزیرلیگی فرخنده‌نی قوتقریش‌ده ناکام بولگن. او، بو سوزلرنی بوگون پارلمان اعضالری تامانی‌دن سوراققه تارتیلگن‌ده ایتگن. علومی، امنیتی کوچلر فرخنده‌نی هجومچی‌لر قولی‌دن قوتقریش‌گه موفق بولمه‌گن‌لیک‌لرینی تصدیق له‌گن.
بیر قطار اوباش ایرکک‌لر پنج‌شنبه کونی حوت آیی نینگ 28- سیده 27 یاشلی فرخنده‌نی قرآن شریف‌نی کویدیرگن‌لیک عیبی بیلن اوت‌گه یاندیریب اولدیرگن ایدی‌لر. خانیم فرخنده‌نینگ بونده‌ی یامان احوال‌ده هلاک ایتیلیشی کابل‌نی قیغوگه چومدیریب، جدی اعتراض‌لرگه باعث بولدی.
فرخنده‌نی اولدیریش جریانی‌ده یازیب آلینگن ویدیوده، ساحه‌ده‌گی پولیس عسکرلری مساله‌گه اعتبار بیرمس‌دن هجومچی‌لر آلدینی آلیب، فرخنده‌نی قوتقریش اوچون هیچ قنده‌ی بیر حرکت قیلمه‌گنی انیق لنه‌دی.
بو مساله، پولیس رسمیلری‌نینگ جدی تنقید آستی‌گه آلینیشی‌گه سبب بولدی. ایچکی ایشلر زویریگه کوره، کابل ایکینچی خوف‌سیزلیک حوزه‌سی نینگ آمری شامل توقیز پولیس‌نینگ ایشی وقتینچه توخته تیلگن. ایتیلیشیچه، بو توغری‌ده تیرگاوو باشلنگن.
بوگون نماینده‌لر مجلسی‌نینگ عمومی ییغینی‌ده سوزله‌گن جناب علومی، خانیم فرخنده‌نینگ موضوعی جدی تیرگاوو قیلینیشی‌نی تیل‌گه آلگن. اونگه کوره، هنوزگچه نیچه کیشی واقعه‌ده قولی بارلیک‌ده گمان سیره‌لیب حبس‌گه آلینگن.
جناب علومی، دستلب پولیس حادثه آلدینی آلگن، اما توقنشوو کوچله‌نیشی بیلن پولیس وضعیت‌نی کنترول قیلیشنی قولدن بیرگن دیگن.
فرخنده‌نینگ خانه دانی‌گه کوره، فرخنده عایشه صدیقه دارالعلوم مدرسه‌سی‌نی بیتیریب، ایندی کابل بیلیم یورتی نینگ شرعیات فاکولته‌سی‌گه اوقیش‌گه کیریش نیت‌ده بولگن.
اوشبو قیزنینگ جسدی اوتگن کون « بیز فرخنده، بیز عدالت ایستیمیز، فرخنده تیریک» دییه شعارلر تیل‌گه آلینیشی بیلن کابل‌نینگ پنج صد فامیلی گورستانی‌ده توپراققه تاپشیریلدی.
فرخنده اوت‌گه یاندیریلب هلاک ایتیلگن ییر شاه دوشمشیره بوگون هم ناراضی‌لیک نمایش‌لر مکانی ایدی. ایتیلیشیچه، بوگون هرات و بلخ ولایت‌لریده هم مینگ‌لب کیشی اعتراض بیلدیریب، فرخنده‌نینگ اولدیریلگن لیگی‌گه عکس العمل بیلدیریب نمایش اوتکزگن‌لر.
