عبدالله: کمسیتیش و حق بیرمسلیک بیلن ملی بیرلیک تأمین بولمه‌یدی

عدالت سیزلیک، کمسیتیش و حق بیرمسلیکلر مملکتده ملی بیرلیک تأمین ایتیلیمس‌لیگیگه سبب بولگن.

بومطلبنی بیان قیلگن اجراییه باشلیغی عبدالله عبدالله، مملکت بویلب حاضرگی شرایطده ملی ریجه‌لر اساسیده افغانستان خلقی نینگ ملی بیرلیگی تأمین ایتیلیشی بیلن دشمن‌گه جدی جواب بیرگن بوله‌میز دیدی.

جناب عبدالله بوگون (چهارشنبه) کابلده مارشال محمدقسیم فهیم نینگ وفاتی اوچینچی ییلینی کوتیب آلیش مراسمیده، افغانستان دشمنلری مملکتده ملی بیرلیک بولمه‌گن بوشلیگیدن استفاده قیله‌دیلر دیگن، ملی بیرلیک حکومت رهبرلری وعده‌لرینی عملگه آشیرمه گن تقدیرده، دشمنلرگه جسارت بیریله‌دی، دیب آگاهلنتیره دی اجراییه باشلیغی.

سابق مدافعه وزیری عبدالرحیم وردک هم، حاضرگی سیاسی، امنیتی و اقتصادی یمان وضعیتدن چیقیش اوچون چاره تدبیرلر کوریلیشی لازم دیب تأکید قیله‌دی. اونگه کوره، بولمسه افغانستاننی ملی کیله‌جگی تهدیدلر بیلن روپه‌ره بوله‌دی.

اوشبو مراسمده حکومت سابق رسمی‌لری اشتراک ایتگن ایدی و جناب فهیم اوزیدن قالدیرگن ایشلرنی آلقیشله دیلر.

مارشال فهیم افغانستان مجاهدلری ارا تانیلگن شخصلردن بیری ایدی. او طالبلرگه قرشی اوروشلر قومندانی، ملی امنیت باشلیغی، ملی مدافعه وزیری و جمهور رییس کرزی نینگ بیرینچی اورین باسری بولیب، مارشاللیک ربته‌سینی دولت تامانیدن کسب قیلگن ایدی.

مارشال محمدقسیم فهیم 1392-ییل 18 حوت یوره‌ک آغریق کسل‌لیگی سبب 57 یاشده وفات ایتدی.