د ملي یووالي حکومت اجرایوي رییس ډاکټر عبدالله عبدالله د وزیرانو شورا په غونډه کې وویل، چې د ټاکنیز سمون او اصلاحاتو په برخه کې باید هېڅ ډول تېښته ونه شي.
نوموړي زیاته کړه، چې د ټاکنیزو اصلاحاتو په برخه کې هغه کارونه، چې باید څو میاشتې مخکې شوي وی؛ تر اوسه نه دي شوي.
نوموړي دا هم وویل، چې د ټاکنیز سمون په موخه د ملي یووالي حکومت د رهبرانو ترمنځ خبرې اترې روانې دي.
اجرایوي رییس ډاکټر عبدالله زیاته کړه، چې د ولسي جرګې او ولسوالیو شوراګانو د ټاکنو د ترسره کېدو کومه نېټه، چې د ټاکنو خپلواک کمېسيون له لوري اعلان شوې عمل به پرې وشي.
له بل لوري د حکومت اجرایوي مشر د وارسا د ناستې له پاره د حکومت له چمتووالي هم خبر ورکړ.
عبدالله وویل، چې افغانستان د نړيوالو مرستو جلبولو تکل کوي او په دغه برخه کې زیات چمتووالی لري.
هغه د وزیرانو شورا په غونډه کې زیاته کړه، چې له افغان امنیتي ځواکونو سره د نړيوالو ملاتړ مهم دی او همدارنګه د فساد سره د جدي مبارزې په هکله نړيوالو ته د افغانستان د ژمنې په اثبات رسولو له پاره ښه فرصت دی.
ډاکټر عبدالله دا هم وایي، د نړيوالو ټولنو په هکله وړاندیز دا دی، چې دوی به له دې وروسته هم له افغانستان سره خپلو مرستو ته دوام ورکړي.
د حکومت اجرایوي رییس وویل، چې له ترورېزم سره د مبارزې او په افغانستان کې د امنیت راوستلو په برخه کې د امريکايي ځواکونو مرستې خورا ګټور ثابتېدلی شي.
