اجراییه باشلیغی عبدالله عبدالله‌نینگ، سیلاولر توزومی‌گه اصلاحات کیلتیریش کمیسیون ایشی باشله‌نیشی و الکترونیکی کیم‌لیک ترقه‌تیش زمانی بیللی بولیشی، ملی بیرلیک حکومتی‌نینگ ایکی وعده قیلگن ایکی ارزشلی ایشلریدن بولگن لیگینی ایتگن.
جناب عبدالله، اوتکن سه‌شنبه کون هرات ولایتی رباط سنگی و کشک کهنه تومن‌لری قوم بویوک‌لری بیلن اوچره‌شگن چاغیده ملی بیرلیک حکومتی‌نینگ اوشبو ایکی ایشی عمل‌گه آشیریلگن صورتده، اجتماعی و سیاسی عدالت‌گه زمینه یره‌تیله‌دی دیگن.
شونینگ‌دیک، اجراییه باشلیغی اوتکن کون، برتیانیا مدافعه وزیری بیلن اوچره‌شگن‌ده، سیلاولر توزومی‌گه اصلاحات کیلتیریش کمیسیون ایشی باشله‌نیشی، دنیا جماعه‌چیلیگی، خلق ایشانچی‌نی جلب ایتیش و سیلاو شفاف بولیشی اوچون یخشی بیر حرکت دیدی ایکنی باره‌سی‌ده تاکیدله‌گن.
وزیرلر کینگشی سونگی اولتیریشی‌ده، الکترونیکی کیم‌لیک ترقه‌تیش لایحه‌سی 28- اسد کابل‌ده باشله‌نیب و اوندن کیین باشقه ولایت‌لرده عمل‌گه آشیریلیشی اوستیگه کیلیشگن.
قوم‌لر آتی و دین جایلشتیریلیشی الکترونیکی کیم‌لیک نینگ جنجل‌لی موضوعی بولیب، بحث‌لرنی چوزیب و کیم‌لیک ترقه‌تیش لایحه‌سینی آرتده قالدیرگن ایدی.
شونینگ‌دیک سلاولر توزومی‌گه اصلاحات کیلتیریش کمیسیونی ایکی هفته آلدین ایشینی باشله‌گن و کیله‌جک اوچ آی‌ده سیلاولر توزومی‌گه اصلاحات کیلتیریش تکلیف‌لرینی حکومت‌گه ارایه ایته‌دی.
سیلاولر توزومی‌گه اصلاحات کیلتیریش کمیسیونی‌نینگ ایجاد ایتیش، ملی بیرلیک حکومتی‌نینگ سیاسی کیلیشوولریدن بیری ایدی. بوندن آلدین جمهور رییس و اجراییه باشلیغی اورته‌سیده، مذکور کمیسیون اعضاسی و باشلیغی‌نی سیلش‌گه قره‌مه قرشی‌لیک‌لر موجود بولگن و بو قره‌مه قرشی‌لیک‌لر مذکور کمیسیون ایشی باشله‌نیشینی آرتده قالدیرگن ایدی.
ملی بیرلیک حکومتی یامان شرایط‌ده ایشینی باشله‌دی
شونینگ‌دیک، جناب عبدالله اوتکن کون فراه ولایتی سیاست‌چیلری و قوم بویوک‌لری بیلن اوچره‌شیب اولرنینگ تنقیدلری توغری‌سیده ایتیشیچه، ملی بیرلیک حکومتی یامان شرایط‌ده ایشینی باشله‌دی دیگن.
بو اوچره‌شووده، فراه ولایت قوم بویوک‌لری، خلق ایستکلریگه حکومت دقت سیزلیگی‌دن تنقید قیلگنلر. اولرنینگ ایتیشیچه، حساس شرایط‌ده تقدیرلری بیللی بولیشی اوچون آواز بیرگن‌لر، بیراق حاضرگه قدر قانونی ایستکلریگه ایریشه آلمه‌گن‌لر.
بیراق جناب عبدالله‌نینگ ایتیشیچه، اوتکن نیچه ییل سیاسی، مالی، امنیتی و قانون سیندیریش قیین‌چیلیک‌لر ملی بیرلیک حکومتی‌نینگ قیین‌چیلیک‌که روپه‌ره قیلگن. اونینگ کوپه‌یتیریشیچه، ینگی حکومت استه‌سیکین خلق ایسته‌گی‌گه ییتیشه‌دی.
