ښکاري چې د ولسمشر اشرف غني او د هغه د مرستیال عبدالرشید دوستم ترمنځ اختلافونه ختم شوي. حکومت کې یوې سرچینې د نوم نه خپرولو په شرط سلاموطندار ته وویل، ښايي دوستم تر راتلونکې یوې اوونۍ هېواد ته بیرته راستون شي.
که څه هم سرچینې د ولسمشر غني او ښاغلي دوستم هوکړې جزیات ورنه کړل خو وايي، د ارګ او د ترکیې لومړي وزیر بن علي ییلدرم ترمنځ د بحث یو مورد هم د عبدالرشید دوستم بېرته راتګ څرنګوالی دی.
د سرچینې په حواله هېواد ته د دوستم بېرته راتګ موضوع له ارګه د بلخ پخواني والي عطا محمد نور له غوښتنو هم وه.
ارګ او ملي جنبش ګوند په دې اړه له څه ویلو ډډه کوي خو اجرایوي رییس عبدالله عبدالله منې چې د ترکیې لومړي وزیر په سفر کې د ښاغلي دوستم برخلیک په اړه هم خبرې اترې شوي.
ښاغلي عبدالله په دې اړه نور جزیات نه دي ورکړي.
په ورته وخت کې د سیاسي چارو شنونکي ضیا رفعت سلام وطندار ته وویل د حکومت له لوري هېواد ته د ښاغلي دوستم راتګ مخنیوی د قانون خلاف و. بلخوا د ښاغلي ایشچي او دوستم دعوا یوه حقوقي مسله ده چې د ولسمشر او مرستیال پر هوکړې يې نه شي حل کیدی.
ښاغلی رفعت په دې باور دی چې ولسمشر غني به له دې مسلې په راتلونکي کې د ښاغلي دوستم پر وړاندې د فشار په توګه کار واخلي.
هغه مهال چې د ښاغلي دوستم سیاسي رقیب احمد ایشچي، د دوستم او د هغه د ساتونکو لهخوا پر نوموړي د جنسي ځورونې شکایت څارنوالۍ کې ثبت کړ؛ ولسمشر د اروپايي ټولنې، متحده ایالتونو او برېتانیا فشارونو لاندې اړ شو د دوستم قانوني واکونه محدود کړي.
له څه مودې وروسته ښاغلی دوستم ترکیې ته ولاړ او تراوسه نوموړي ته افغانستان ته د راستنیدو اجازه نه ده ورکړل شوې.
