.jpg)
اوتگن هفته «چهارشنبه» کون، مملکت کابینه‌سی کانکور سیناوی طلب کارلرینی سهمیه‌بندلیک ریجه‌سی‌نی تصدیق‌لگنیدن سونگ، اجتماعی ترماقلرده یشاوچیلردن بیرقطاری، بو ریجه‌نی قومی دیب و قرشی‌لیک بیلدیرگن‌لر.
بیراق، بوگون «شنبه» کابل‌ده خبری بیر ییغین اوتکزگن عالی اوقوو وزیرلیگی رسمی‌لری‌نینگ ایتیشیچه، کانکور رقابتی بیر جریان دیر و هیچ قچان ولایت‌لرنی نفوذی اساسیده، سهمیه‌بندلیک بولمه‌یدی.
عالی اوقوو وزیرلیگی‌نی سوزلاوچیسی فیصل امین گه کوره، کانکورنینگ ینگی ریجه‌سی ملی، جامع و مملکت‌ده عالی اوقوو وزیرلیگی‌نینگ حاضرگی شرایطی اساسیده توزه‌لگن و بو ریجه گه اساس، کانکور کرسی‌لریدن 75% عمومی و 25% هم هر بیر زون بوییچه رقابت گه قوییله‌دی.
جناب فیصل‌نینگ ایتیشیچه، کانکور سیناوی مملکت بویلب اوتگن ییل‌لر کبی عمومی شکلده یولگه قوییله‌دی، بیراق کانکور کرسی‌لریدن 25% طب، انجنیرلیک، حقوق، اقتصاد، ایکینچیلیک و کمپیوتر ساینس بولیم‌لری زونلرده ایری رقابت‌لر یولگه قوییله‌دی.
.jpg)
شونینگدیک، اوشبو ییغینده معارف وزیرلیگی سوزلاوچیسی نوریه نزهت نینگ ایتیشیچه، کانکورنینگ ینگی ریجه‌سی قومی و سمتی ایمس دیر، بلکیم بو ریجه مملکت‌ده حاضرگی تعلیمات شرایطی‌گه اساس توزه‌لگن. اونگه کوره، بو ریجه برچه قوم‌لر اوچون تینگ تعلیمات زمینه‌لری یره‌تیلیش نیتیده تیارلنگن.
اوتگن هفته مملکت کابینه‌سی تامانیدن تصدیق‌لنگن ریجه اساسیده، باشکینت‌دن باشقه، ایریم رشته‌لرده آز رواجلنگن ولایت‌لرنینگ کانکور سیناوی طلب‌کارلری اوچون مشخص سهمیه نظرگه آلینگن. بو ریجه بیرینچی تصدیق‌لنگن ساعت‌لریده اجتماعی ترماقلر آرقه‌لی یشاوچی‌لرنینگ جدی عکس‌العمل‌لریگه روپه‌ره بولدی.
