فهیم فرخاری، 28 کون آلدین تالقان شهرینینگ سرایسنگ 6- سرکیدن یوقالگن. بو واقعهدن نیچه کون اوتگنیدن سونگ، اونینگ عایلهسی پولیسگه شکایت قیلیب و اوغلینی اوغیرلنگنینی ادعا قیلگن.
بو واقعهدن بیر هفته اوتگنیدن سونگ، 3 کیشی بو توغریده پولیس تامانیدن قولگه آلینگن.
بوگون "یکشنبه" تالقان یشاوچیلریدن بیرقطاری و جناب فرخارینینگ عایله اعضالرینی بیر اعتراضی ییغین آرقهلی ایتیشیچه، حکومت بو واقعه عامللرینی قولگه آلیشگه موفق بولمهگن.
فهیم فرخارینینگ آتهسی حاجی عاشورمحمدنینگ ایتیشیچه، اوغلی نمایندهلر کینگشی اعضاسی عبدالله بیک نینگ ایناغهسی رووف بیک تامانیدن اوغیرلنگن و پولیس مسووللری اونی قولگه آلیشگه موفق بولمهگن.
فهیم فرخارینینگ ایناغهسی صفیالله حقجو نینگ امنیتی ادارهلردن تنقید قیلیب ایتیشیچه، محلی ارگانلر باشلیغی متین بیک بو دوسیهگه دخالت قیلهدی، انهشو سبب امنیتی مسووللر اوز وظیفهلرینی انجام بیره آلمهیدی.
عینحالده، تخار حاکمی فضلالله مجددینینگ ایتیشیچه، فهیم فرخارینینگ عایلهسی بو توغریده 4 کیشینی عیبلگن و بو جملهدن 3 تهسی قولگه آلینگن و عیبدار بولگن کیشیلردن باشقه بیرینی قولگه آلیش اوچون سعی و حرکتلرنی دوامی بار.
بیراق نمایندهلر کینگشی اعضاسی عبدالله بیک نینگ ایتیشیچه، فهیم فرخارینی اونینگ ایناغهسی تامانیدن اوغیرلنگنی اثباتلنگن صورتده، اونی پولیسگه تاپشیریشی ممکن.
فهیم فرخاری نینگ عایلهسی عبدالله بیک بیلن قوشنی دیر. اولرنینگ ادعا قیلیشیچه، عبدالله بیککه تیگیشلی کیشیلر بوندن آلدین هم فهیمنی اوغیرلش اوچون سعی و حرکت قیلگن ایدی؛ بیراق بیرقطار کیشیلرنینگ دخالت قیلیشی باعث، موفق بولمهگن.
فهیم فرخاری نینگ اوغیرلنیشیدن بیر آی اوتماقده، بیراق اونینگ سرنوشتی حاضرگهقدر هم معلوم ایمس.
