بلخ ولایتینینگ دهدادی تومنی اوقیتووچیلریدن بیرقطاری، مذکور ولایت نینگ معارف ریاستی دفتری اونگیده توپلهنیب 1396- ییل، قوس آیینینگ آیلیگی توللنمهگنی باعث، اعتراض بیلدیرگنلر.
اوشبو اوقیتووچیلرنینگ ایتیشیچه، بلخ ولایتینینگ معارف ریاستیده اداری فساد موجودلیگی و وظیفه گه توغری شکلده دقت قیلینمهگنی سبب، بلخ ولایتینینگ دهدادی تومنیده 12 مکتب نینگ ایشلاوچیلرینی آیلیگی توللنمهگن.
اعتراضچی اوقیتووچیلردن بیری محمد محسن نینگ ایتیشیچه، معارف ریاستی اولردن قوس آیلیگی بدلیده جوزا آیینینگ آیلیگیدن وازکیچیشلرینی ایستهگن.
شونینگدیک، باشقه بیرقطارینینگ ایتیشیچه، بلخ ولایتینینگ معارف ریاستی باشلیغی، اعتراضچی اوقیتووچیلرنینگ برابریده قورالدن فایدهلنیب و اولرنی حرمت سیزلیک بیلن دفتری دن چیقارگن.
بلخ ولایتینینگ معارف ریاستی باشلیغی صبغتالله مستقیم، بو توغریده صحبت بیریشگه حاضر بولمهدی؛ بیراق بلخ معارف ریاستینینگ مالی و حسابدارلیک مسؤولی سید مسیرنینگ ایتیشیچه، اولر اوقیتووچیلرنینگ اعتراضی موضوعینینگ معارف وزیرلیگی بیلن شریک قیلگن؛ بیراق مالیه وزیرلیگی همکارلیک قیلمهگی باعث، اوقیتووچیلرنینگ آیلیگی حاضرگچه توللنمهگن.
جناب مسیرگه کوره، بلخ ولایتینینگ معارف ریاستی اوقیتووچیلرنینگ آیلیگی توغریسیده 73 میلیون افغانی قرضدار دیر؛ لیکن یالغیز دهدادی تومنینینگ اوقیتووچیلرینی آیلیگی توللنمهگن، بلکیم باشقه تومنلر هم شوندهی بیر تقدیرگه روپهره بولیب تورگن.
بلخ معارف ریاستی مالی و حسابدارلیک مسؤولی نینگ ایتیشیچه، اوقیتووچیلرنینگ قوس آییده بولگن آیلیکلری بیردیک توللنگن صورتده، معارف ریاستی اولرنینگ جوزا آیی آیلیکلرینی تولله آلمهیدی. شو یوزهدن اوقیتووچیلرنینگ آیلیکلری قسط شکلده توللنیشی توغریسیده سعی و حرکت قیلینهدی.
