هلمند ولایتیده ناگرانلر و شهیدلرنینگ عایله اعضالریدن مینگلرچهسی نینگ ایتیشیچه، کونده حقوقلرینی آلیش اوچون مذکور ولایت بوییچه شهیدلر و ناگرانلر آمریتی گه مراجعت قیلیشهدی، بیراق اویلریگه قوللری بوش قیتیشهدی.
مذکور ناگرانلردن بیرقطاری نینگ سلاموطندارگه ایتیشیچه، نیچه آیدن بویان حقوقلرینی قولگه کیریتیشنی کوتیشهدی، بیراق حاضرگهقدر حقوقلرینی قولگه کیریته آلمهگنلر.
اولرگه کوره، شهیدلر و ناگرانلر آمریتی نینگ مسؤوللری، رشوه بیرگن کیشیلرنینگ حقوقلرینی بیرهدییلر.
هلمند ولایتی بوییچه شهیدلر و ناگرانلر آمری ادریس افغان، ناگرانلرنینگ شکایتینی تَن آلهدی، بیراق مراجعتچیلر تامانیدن بیر اداره نینگ ایشلاوچیلری گه رشوه بیریلیشینی رد قیلهدی.
جناب افغان نینگ ایتیشیچه، بوتون مستحقلرنینگ حقوقی توللنیشی اوچون 612 میلیون افغانی بودجه کیرهک، بیراق بونچه بودجه دن یالغیز 188 میلیون افغانی بو اداره گه ییتیشگن.
اونینگ کوپهیتیریشیچه، ناگرانلرنینگ حقوقی توللنیشی قاعده اساسیده باشلنهدی، بیراق اساسی قیینچیلیک بودجه کوپهیگنیدن سونگ، حل ایتیلهدی.
هلمند ولایتی بوییچه شهیدلر و ناگرانلر ادارهسی نینگ مسؤوللری تامانیدن بیریلگن معلومات اساسیده، مذکور ولایتده 11 مینگ ناگران و شهید عایلهسی رویخطگه آلینگن و بو رقم کوندهلیک آشهدی.
