تخار ولایتی کینگش نماینده‌لری، قورال‌لی طالب‌لر اوز کیشیلرینی ماورای کوکچکه دریاسی قیرغاغی‌ده جایلشتیریش‌گه حرکت قیله‌دی دیگن‌لر.
جنگری طالب‌لری اوتگن کون (چهارشنبه) امنیتی کوچلر بیلن توقنشگندن سونگ ولایت ردقد ولسوال‌لیگی بناسی‌نی اوز اشغال‌لریگه آلیش‌گه موفق بولگن.
کوکچه و آمو دریا اره‌سیده جایلشگن درقد ولسوال‌لیگی تخار ولایت مرکزی تالقان شهری بیلن یوز کیلو متر فاصله‌سی بار. مذکور ولسوال‌لیک اورمان بیلن قاپلگن 90 کیلومتر تاجیکیستان بیلن قوشمه چیگره‌گه ایگه.
تخار ولایت کینگشی‌نینگ اعضاسی صلاح‌ا‌‌لدین برهانی‌نینگ ایتیشیچه، مرکزی حکومت تخارده‌گی حربی کوچلر بیلن هماهنگ‌لیگی یوق. جناب برهانی، درقد ولسوال‌لیگیده‌گی ملی کوچلرگه حربی جهاز ییتکزیب بیریلمه‌گنی سبب اوشبو تومن جنگریلر تصرفی‌گه اوتگن دیگن.
تخار ولایت کینگشی‌نینگ باشلیغی عصمت قربانی، طالب‌لر چیگره منطقه‌لرنی تصرف قیلیش بیلن مملکت شمال شرقی‌ده نابرقرارلیک‌لر میزانی آشیشی‌دن علاوه افغانستان‌نی شمالی قوشنی‌لری جمله‌دن تاجیکستان بیلن بولگن علاقه‌سی‌گه سلبی تاثیر قویه‌دی دیگن.
باشقه تاماندن، تخار امنیتی مسوول‌لریگه کوره، حاضر افغان ملی کوچلری بیلن دولت قورال‌لی مخالف‌لری اورته‌سیده‌گی اوروش خواجه‌غار تومنینی تورت کیلو مترلیگی‌ده دوام ایتماقده.
ولایت والیسی‌نینگ سوزلاووچی‌سی سنت الله تیمورنینگ سلام وطندارگه ایتیشیچه، ایکی کونلیک اوروش جریانیده افغان ملی کوچلری جنگری طالب‌لرگه آغیر تلفات ییتکزگن‌لر. جنگ‌ده 20 اولدیریلگن و 30 ته تن جراحتی آلگنی ایتیله‌دی.
شونینگ‌دیک جناب تیمور، امنیتی کوچلر بیلن طالب‌لر اورته‌سیده یوز بیرگن اوروش‌ده پولیس‌نینگ بیر عسکری قوشیمچه بیش نفر تینچ هالی قربان بولگن دیگن.
عین حالده، روسیه دولتی هم طالب‌لرنی مرکزی آیسا دولت‌لریگه هجوم قیلیشی توغریسیده آگاهلنتیرگن.
