بدخشان رسمی‌لری‌نینگ ایتیشیچه، طالب‌لر مذکور ولایت یمگان تومنی امنیت آمری شامل امنیتی کوچلردن 9 ته‌سینی آتیب اولدیریب و باشقه بیری‌نینگ باشینی کیسگن. ایتیلیشیچه، امنیتی کوچلردن باشقه 15 ته‌سی دردک سیز بولگن و طالب‌لر اولردن 4 ته‌سینی وردوج تومنی تیرگردان منطقه‌سیده انتقال بیرگن.
بدخشان ولایتی‌نینگ پارلمانده‌گی نماینده‌سی ولی نیازی سلام‌وطندار بیلن اوتکزگن صحبتیده، اوشبو مطلب‌نی بیان ایتیب کوپه‌یتیریشیچه، طالب‌لر یمگان تومنی‌نینگ نظارت‌گه آلگنیدن کیین، حاضر کران‌ومنجان تومنی‌نی باسیب آلیش نیتیده بولگن.
جناب نیازی‌گه کوره، یمگان تومنی کران‌ومنجان اوچون دفاعی کمربند ایدی، بیراق اوشبو تومن سقوطی‌دن کیین، طالب‌لر کران‌ومنجان تومنی اوشنگان منطقه‌سیگچه ایلگری کیلگن.
نماینده‌لر کینگشی اوشبو اعضاسی‌نینگ ایتیشیچه، «طالب‌لر حاضر مذکور تومن‌ده 600 کیشی‌لیک گروه قومندانی ملک بیلن مذاکره قیلماقده، قومندان ملک بدخشان ولایتی لاجورد کان‌نی ناقانونی شکلده ایشلب چیقاره‌دیگن کیشی دیر».
شونینگ‌دیک بدخشان والیسی فیصل بیگ‌زاد، قومندان ملک بیلن طالب‌لر اورته‌سیده باشلنگن مذاکره خبرینی تأیید قیلیب، کوپه‌یتیریشیچه، اوشبو قومندان اونگه ایشانچ بیرگن کیم، طالب‌لرگه کران‌ومنجان تومنی‌گه کیریش خصوصیده رخصت بیرمه‌یدی.
جناب بیگ‌زادگه کوره، طالب‌لر کران‌ومنجان‌نی قولگه کیریتیش‌گه حرکت قیلمه‌یدی، اوشبو گروه اعضالریدن کمیده 40 کیشی‌سی حاضرگچه اوشنگان منطقه‌سیده بولگن.
شونینگ‌دیک بدخشان والیسی، امنیتی کوچلردن 15 ته‌سی هلاک بولیب و یره‌لنگنی و اوشبو کوچلردن 4 ته‌سی وردوج تومنی تیرگران منطقه‌سیده آلیب کیتیلگنینی تأیید قیله‌دی، بیراق اوشبو کوچلردن 15 ته‌سی درک‌سیز بولگنینی قبول ایتمه‌یدی.
انه شونده‌ی، والی اورین باسری گل‌محمد بیدارنینگ ایتیشیچه، یمگان‌ده امنیتی کوچلر بیلن طالب‌لر اورته‌سیده یوزبیرگن توقنه‌شوولر نتیجه‌سیده، 35 طالب هلاک بولگن.
جناب بیدارنینگ ایتیشیچه، هوا وضعیتی یمان‌لیگی باعث، بو تومن‌گه یاردمچی کوچ یوباریلمه‌گن و هوا وضعیتی یخشی بولگن چاغده، یمگان تومنی‌گه یاردمچی کوچ یوباریلیشی ممکن.
حاضر امنیتی کوچلر تومن مرکزیدن حضرت سعید منطقه‌سیگه آرقه چیکیلگن. طالب‌لر یمگان تومنی‌ده‌گی مخابراتی پایه‌لرنی ییقیتیب، محلی کوچلر بیلن علاقه باغلش‌نی امکان‌سیز قیلگن.
ایتیلیشیچه، طالب‌لر مذکور ولایت‌نینگ راغستان، یفتل، تگاب، کشم، بهارک و شهدا تومن‌لری ایریم منطقه‌لرینی نظارت‌گه آلگن.
