هرات ولایتی‌نینگ شیندند تومنی‌ده‌گی طالب‌لر، مذکور تومن معارف رسمی‌لریگه مکتب‌لرده درسی کتاب‌لردن بیرقطاری‌نی حذف ایتیب و دینی مضمونلر کوپه‌یتیریلیشی خصوصیده بویروغ بیردی.
شیندند تومنی معارف مدیریتی سرپرستی عبدالناصر مودودی‌نینگ سلام‌وطندارگه ایتیشیچه، طالب‌لر مکتب‌لرده «مدنیت و تمدن» مضمون‌لری اورنیده دینی مضون‌لر اوقیلیشینی سوره‌گن.
شونینگ‌دیک جناب مودودی‌نینگ ایتیشیچه، بو هشداردن کیین، کوپینچه عایله‌لر فرزندلری‌نینگ مکتب باریشی‌گه توسیق بولگن. اونگه کوره، مذکور تومن‌ده امنیتی تهدیدلر باعث، ایکی مکتب‌دن باشقه مکتب‌لر ایشیگی اوقووچیلر برابریده یاپیلگن.
عین حالده، هرات ولایتی‌نینگ معارف باشلیغی عبدالرزاق احمدی‌گه کوره، شیندند تومنی قوم بویوک‌لری و معارف رسمی‌لری بیلن طالب‌لرنینگ هشداری توغری‌سیده صحبت اوتکزگن و اولر بو قیین‌چیلیک‌لرگه ییچیم یول تاپیش خصوصیده طالب‌لر بیلن صحبت اوتکزیش‌گه وعده بیرگن.
هرات ولایتی معارف ریاستی مسؤول‌لری‌گه کوره، شیندند تومنی‌نینگ کمیده 80 مینگ اوقووچیسی بار؛ بو جمله‌دن 40% قیزلر تشکیل بیره‌دی.
شونینگ‌دیک بوندن آلدین، هرات ولایتی انسان حقوق‌لری کمیسیونی، هرات ولایتی ایریم تومن‌لریده کوپینچه مکتب‌لر ایشیگی یاپیلگنی توغری‌سیده خواطر بیلدیرگن ایدی.
