قطرده‌گی طالبلر سیاسی وکالتخانه‌سی‌نینگ هیاتی پاکستانلیک رسمیلر بیلن ملاقات قیلیش اوچون اسلام آباد کیتگن.
پاکستان نینگ بلوچستان ایالتیده‌گی آزاد خبرچی رزاق برق نینگ ایریم گزارشلرگه اساسلب یازیشیچه، اوشبو اوچ کیشیلیک هیات ملاشهاب‌الدین دلاور، ملاجان‌محمد مدنی و ملاعبدالسلاملردن عبارت بولگن. بولر افغانستان حکومتی بیلن تینچلیک مذاکره‌نی قیته‌دن باشلش نیتده اوتگن هفته چهارشنبه کونی اسلام آبادگه سفر قیلگنلر.
شونینگدیک جناب برق، طالبان حرکتی نینگ رسمیلری پاکستان حکومتی رسمیلری بیلن ملاقات اوتکزگندن سونگ قطرگه قیتگن‌لیکلرینی معلوم قیلگن. لیکن، بو خبر هنوزگچه پاکستان رسمیلری ینه طالبان حرکتی تامانیدن تصدیق ایتیلمه‌گن.
سیاسی تحلیلچی محب‌الله شریف، حکومت بیلن طالبان اوتکزه‌جک مذاکره استخباراتی مساله بولگن لیگی اوچون ییتکرمه‌لر (رسانه) لر نظریدن چیتده بولیب اوتگن دیدی. بیراق، طالبلر تینچلیک مذاکره‌سیگه قوشیلیش اوچون قیته دن سعی وحرکت‌گه باشله‌گنلیکلری هم اونچه‌لیک توغری ایمس دیدی جناب شریف.
طالبان بلند مرتبه‌لی رسمیلرینی پاکستان‌گه سفر قیلگن لیگینی تصدیق ایتگن باشقه بیر سیاسی تحلیلچی وحیدمژده، سفرنینگ اساسی موضوعی طالبان نینگ پاکستان‌ده حبس‌گه آلینگن اعضالری اوستیده بحث آلیب باریش دیگن.
بریتانیانینگ گاردین کونده لیگی سونگی ایکّی آی ایچیده افغانستان ملی خوفسیزلیک اداره‌سی نینگ باشلیغی معصوم استانکزی ایکّی مرته قطرده طالبان حرکتی نینگ یوقاری مرتبه‌لی رسمیلری بیلن اوچره‌شگنی حقیده یازگن بیر پیتده طالبان رسمیلری اسلام آبادگه سفر قیلماده. اما، بو خبر ایسه طالبان سیاسی وکالتخانه‌سی تامانیدن رد ایتیلگن.
شونینگدیک افغانستان ملی خوفسیزلیک اداره‌سی باشلیغی و طالبان نمایند‌ه‌سی اورته‌سیده اوتکزیلگن مذاکره جدی تنقیدلرگه هم سبب بولدی. اوتگن هفته نماینده‌لر مجلسی نینگ اعضالری رسمی کابل ملازملری بیلن طالبان نماینده‌لری اورته‌سیده اوتکزیلگن مذاکره‌نی تنقید آستیگه آلیب، مملکت عالی تینچلیک کینگشی جریانگه قوییلمس‌دن توریب طالبلر بیلن هر قنده‌ی مذاکره اوتکزیش افغانستان خلقی تقدیری اوچون ییریک بیر معامله دیگن ایدیلر.
