بوگون «شنبه» کابل‌ده خبری بیر ییغینده نطق سوزله‌گن تینچلیک عالی کینگشی نینگ دبیرخانه باشلیغی، تینچلیک بوییچه منطقه‌یی کیلیشوو ایشلری خصوصیده جمهور رئیس نینگ خاص نماینده‌سی و تینچلیک مصلحتی قورولتایی‌نی یولگه قویه‌دیگن کمیسیون باشلیغی عمر داوودزی نینگ ایتیشیچه، تینچلیک مصلحتی قورولتایی‌ده مملکت نینگ بوتون یشاوچی‌لرینی نماینده‌لری اشتراک قیله‌دی و طالبان گروهی تینچلیک مصلحتی قورولتایی‌ده اشتراک قیله‌دیگن‌لرگه توسیق بولمس‌لری کیره‌ک.
داوودزی گه کوره، تینچلیک مصلحتی قورولتایی‌ده بوتون سیس‌لر ایشیتیله‌دی و طالبان نظارتی‌ده بولگن منطقه‌لرنی یشاوچیلری‌نینگ سیس‌لری هم ایشیتیلیشی کیره‌ک.
اونینگ کوپه‌یتیریشیچه، اوشبو قورولتای گه طالبان گروهی هم چقیریلیشی خصوصیده بحث دوام ایتماقده.
تینچلیک مصلحتی قورولتایی‌نی یولگه قویه‌دیگن کمیسیون باشلیغی گه کوره، بو قورولتای ده ولایتی کینگش نینگ بوتون اعضالری، نماینده‌لر کینگشی سیلاویده غلبه قازانگن نماینده‌لر، مدنی جماعه‌چیلیک نماینده‌لری، عیاللرنینگ نماینده‌لری، یاشلر و دین عالم‌لری اشتراک قیله‌دی.
شو توغریده…
داوودزی: تینچلیک سوزلشوولر چوزیلگنی سورا‌قلی دیر
جناب داوودزی نینگ اوتگن چهارشنبه کونی افغانستان تینچلیک لایحه‌سی بوییچه آمریکا تشقی ایشلر وزیرلیگی‌نی خاص نماینده‌سی زلمی خلیلزاد بیلن مملکت سیاستچی‌لری و حکومت رهبرلری‌نینگ اوچره‌شووی توغریسیده ایتیشیچه، جناب خلیلزاد بو ییغینده دوحه تینچلیک سوزلشوولری توغریسیده مفصل معلومات بیرگن و اوشبو سوزلشوولرنی یاشیرین زاویه‌لری توغریسیده وجودگه کیلگن چیگل‌لیک‌لرنی بیر قسمی رفع ایتیلگن.
تینچلیک عالی کینگشی دبیرخانه باشلیغی گه کوره، حکومت رهبرلری، سیاسی سیمالر و جناب خلیلزاد، یکشنبه کون جمهورلیک ریاستی سرایی‌ده آمریکا و طالبان گروهی نینگ نماینده‌لری آره‌سیده یولگه قوییله‌دیگن تینچلیک سوزلشوولرینی آلتینچی دوری خصوصیده بحث قیله‌دیلر و بو ییغین یولگه قوییلیشی و تأریخی توغریسیده قرار قیلینه‌دی.
افغانستان تینچلیک لایحه‌سی بوییچه آمریکا تشقی ایشلر وزیرلیگی‌نی خاص نماینده‌سی زلمی خلیلزاد، اوتگن کون اسلام‌آباد مقصدی گه کابل نی ترک قیلدی.
میدیالر تامانیدن بیریلگن گزارش گه کوره، جناب خلیلزاد بو سفریده پاکستان تشقی ایشلر وزیری شاه‌محمود قریشی بیلن قطرنینگ دوحه شهریده یولگه قوییلگن تینچلیک سوزلشوولری توغریسیده بحث قیلگن.
