شهلا ابوبکر، عضو شورای ولایتی فراه به سلام‌وطندار می‌گوید که به دلیل تهدید طالبان، فعالیت شبکه‌های مخابراتی، روشن، افغان بی‌سیم، اتصالات و ام‌تی‌ان از 4 روز به این‌سو در این ولایت قطع شده است.
به گفتۀ او، اکنون تنها شبکۀ دولتی سلام در این ولایت فعال است، اما این شبکه نیز به گونۀ درست کار نمی‌دهد.
این عضو شورای ولایتی از بی‌توجهی حکومت نسبت به این موضوع انتقاد می‌کند و می‌گوید، توقف فعالیت شبکه‌های مخابراتی در این ولایت، مردم را با مشکلات زیادی مواجه کرده و روی فعالیت‌های اقتصادی نیز تأثیر منفی گذاشته است.
عبدالرحمن ژوندی، از فعالان مدنی فراه نیز از توقف فعالیت شبکه‌های مخابراتی در این ولایت ابراز نگرانی می‌کند و می‌گوید که با توقف فعالیت شبکه‌های مخابراتی، بیشتر باشنده‌گان این ولایت به ویژه بازرگانان، متضرر شده‌اند.
.jpg)
شماری از باشنده‌گان فراه نیز می‌گویند که با توقف فعالیت شبکه‌های مخابراتی، چهار روز است که از بسته‌گان و بیماران‌شان در دیگر ولایت‌ها اطلاعی ندارند.
تلاش کردیم دیدگاه ریاست مخابرات ولایت فراه را نیز داشته باشیم، اما مسئولان این اداره حاضر به گفت‌وگو نشدند.
اما محب‌الله محب، سخنگوی پولیس فراه توقف فعالیت شبکه‌های مخابراتی خصوصی از سوی طالبان را رد می‌کند و می‌گوید که ممکن است دلیل توقف فعالیت شبکه‌های مخابراتی خصوصی مشکل فنی باشد.
طالبان تا کنون در این باره ابراز نظر نکرده‌اند.
در همین زمینه:
طالبان فعالیت شبکه‌های مخابراتی را در جوزجان به گونۀ کامل قطع کرده‌اند
