د غور اوسېدونکي او د ولایتي شورا غړي د دې ولایت شپږو لویديځو ولسوالیو کې د طالبانو له پراخ حضوره اندېښنه څرګندوي او وايي، د دې ډلې غړي له څو اوونیو راپهدېخوا هڅه کوي چې د دیني مدرسو ځوانان او نويځوانان د طالبانو ډلې ته جذب کړي.
د دې ولسوالیو اوسېدونکي هم وايي، دوی خپل اولادونو مدرسو ته د دیني زدهکړې لهپاره لېږي؛ خو وسلهوال طالبان د ځوانانو له احساساتو کار اخلي او په خپلو تبلیغاتو سره هغوی د موجود نظام او دولت پروړاندې پاروي.
د دوی په وینا، طالبان په خلکو ظلم کوي او هغوی د عُشر او ذکات ورکولو ته مجبوره کوي.
د غور ولایتي شورا غړی عبدالحمید ناطقي هم دغو ولسوالیو کې د طالبانو له لوري د سرتېرو جذبول تاییدوي او وايي، دغه ډله خلکو او دیني مدرسو کې له خپل نفوذه په ګټنې د نويو او تنکيو ځوانان د جذبولو او د دولت پر ضد د کارولو هڅه کوي.
خو د غور والي ویاند عبدالحی خطیبي وايي، دوی تراوسه د طالبانو سرتېرو جذبولو په اړه کوم رپوټ نهدی ترلاسه کړی.
د ښاغلي خطیبي په وینا، د دې ډلې غړي د خپلو ناوړو تبلیغاتو په لاره اچولو سره هڅه کوي، پر عامولس خپلې ګټې تامین کړي. دی د غور اوسېدونکیو ته وایي چې طالبان د دې ولایت هېڅځای کې ملاتړي نهلري.
د غور اوسېدونکي او د ولایتي شورا غړي پهداسې حال کې د طالبانو د سرتېرو جذبولو او ځورونو نه شکایت کوي چې په وینا یې، دغه ډله تر خپل کنټرول لاندې سیمو کې د پراختیايي پروژو پلي کېدو او ښوونځیو ته د نجونو د تلو مخه نیسي.
ورته مطالب:
جوزجان کې د طاهر یولداش زوی او یو پاکستانی جنرال طالبانو ته کسان جذبوي
جوزجان کې ازبکستاني وسله وال د ترهګریزو فعالیتونو له پاره ماشومان جذبوي
