افغانستان کې د سولې راوستلو لهپاره د هڅو په دوام او په هېواد دننه او بهیر کې د سولې له غونډو وروسته دا ځل اروپايي ټولنې د «افغانستان فرهنګ؛ د سولې فرهنګ» تر نوم لاندې غونډې په جوړولو سره هڅه کوي چې هېواد کې د سولې راتلو لهپاره زمینې برابرې کړي.
د سولې عالي شورا سلاکار عبدالحکیم مجاهد دې غونډه کې وویل، کهچېرې طالبان د افغان حکومت د سولې غوښتنې ته مثبت ځواب ورکړي؛ د دوی په ټولو غوښتنو به د خبروـ اترو پر مېز بحث وشي.
د ښاغلي مجاهد په وینا، طالبان خپلو کې د مشورو او خبرو په حال کې دي او د افغانستان د سولې غوښتنو په اړه به خپل دریځ مناسب وخت کې اعلان کړي.
ښاغلی مجاهد وايي، د سولې عالي شورا له وړاندې طالبانو سره مخامخ او غیرمستقیمې اړیکې لري چې دغه اړیکې به ډېر ژر پایله ورکړي.
د سولې عالي شورا سلاکار په وینا، پر طالبانو له بهر او دننه فشار راوستل ګټه نهلري او له دې ډلې سره باید د مخامخ خبرو زمینه برابره شي.
د اروپايي ټولنې استازي پییر مایدون هم دې غونډې کې د ګډون پر مهال وویل چې د افغانستان د سولې پروګرام پراخ، بېمخینې او د نړۍ په کچه دی او دوی لهدې پروګرامه ملاتړ کوي.
د مایدون په وینا، اوس ډېر ژر دی چې د افغانستان د سولې غوښتنو په اړه چې د کابل بهیر کې مطرح شوې؛ پرېکړه وشي.
د اروپايي ټولنې استازی زیاتوي، دا چې طالبانو تراوسه پورې د افغان حکومت د سولې غوښتنو په اړه سکوت غوره کړی؛ دا خپله دغې غوښتنې ته د مثبت ځواب ورکولو معنا لري او طالبان خپلو کې د خبرو په حال کې دي.
افغانستان کې د اروپايي ټولنې استازی همدارنګه وايي، دوی د ولسمشرۍ مانۍ، ولسي جرګې او ولسوالیو شورا ټاکنو کې همکارۍ ته چمتو دي او را روانو ټاکنو ته یې څه باندې ۳۰ میلیونه یورو بېلې کړېدي.
دا داسې مهال دی، د اروپايي ټولنې ځانګړې استازې فډریکا موګیرني تاشکند غونډه کې ویلي وو، کهچېرې طالبان د افغانستان سولې غوښتو ته مثبت ځواب ورکړي؛ د ملګروملتونو سازمان له تور نوملړه به د دې ډلې په ویستلو کې همکاري وکړي.
