طالبان گروهی بیر اعلامیه ترقهتیب ایتیشیچه، اوشبو گروه نینگ آمریکا بیلن امضالهگن تینچلیک کیلیشوونامهسی، افغانستان حکومتی و آمریکا کوچلر آرقهلی نقض بولگن. مذکور گروه بوگون (یکشنبه 17- حمل) بیر اعلامیه نشر قیلیب یازیشیچه، بو گروه اعضالری تینچلیک کیلیشوونامهسی نینگ برچه موردی نی عملی قیلگن.
مذکور گروه محبوسلری افغانستان قماقخانهلریدن قوییب یوباریلیشی نینگ آرتده قالگنی، آمریکا و افغانستان حکومتی آرقهلی نقض ایتیلگن موردلردن بیری دییلگن. اوشبو گروه نینگ ایتیشیچه، بو گروه محبوسلری افغانستانلیکلرارا سوزلشوولر باشلنمهسیدن آلدین قوییب یوباریلیشی گه قرار قیلینگن ایدی، بیراق تورلی بهانهلر بیلن بو پروسه توغری آلغه کیتمهگن.
طالبان محبوسلری قوییب یوباریلمهگنی گه علاوه، شونینگدیک بو موضوعلر تینچلیک کیلیشوونامهسی نقض ایتیلیشی دییلگن: اوروش منطقهسیده قرار تاپمهگن طالبان مرکزلری هجوم آستیده آلینیشی، یشش منطقهلر هوایی هجوم و بمباردمان گه دوچ کیلیشی و طالبان نظارتی گه بولگن منطقهلرگه هیچ بیر آتیشمه یوزبیرمسدن هوایی هجوم اویوشتیریلیشی.
مذکور گروه نینگ اعلامیهسیده کیلیشیچه، طالبان اسلامی امارتی حاضرگچه تینچلیک کیلیشوونامهسیدهگی برچه موضوعلرنی عملی قیلگن.
طالبان گه کوره، اسلامی امارت هر دایم افغانستان نمایندهلری بیلن مذاکره قیلیش اوچون تیارگرلیکلریدن سوزبیرگن، بیراق مذکور گروه محبوسلری قوییب یوباریلمهگنی افغانستانلیکلرارا سوزلشوولرنی آرتده قالدیرگن.
اعلامیهده کیلیشیچه: «افغانستان نینگ هلمند، کندهار، فراه، کندز، ننگرهار، پکتیا، بدخشان، بلخ و شونینگدیک باشقه بولیملریده تینچلیک کیلیشوونامهسی نقض ایتیلگن.»
اعلامیه آمریکا دن کیلیشوونامه نی رعایت قیلیش گه علاوه، شونینگدیک باشقه همکارلرینی هم اونینگ بوتونلی رعایت قیلیش اوچون متوجه قیلیشی نی سورهگن.
طالبلرنینگ اورغولشیچه، بوندهی تخطیلر دوام تاپگن صورتده، ایشانچسیزلیک اورته گه کیلهدی و طالبان مذکور هجوملرگه عکسالعمل کورسهتیب آتیشمه میزانی نی کوپهیتیریشی ممکن.
