د جوزجان ولایت سیمهییز چارواکي وايي، چې تېره ورځ وسلهوالو طالبانو د یاد ولایت له قوشتپې ولسوالۍ ۹ کوچیان هغه مهال یوړل، کله چې د داعش ډلې پورې اړوند وسلهوال د طالبانو له سیمې یو کوچی سره د لسګونو پسونو د طالبانو د حاکمیت له سیمې وتښتول.
د جوزجان درزاب ولسوال رحمتالله حشر سلاموطندار ته د پېښې د تایید ترڅنګ وویل، چې لومړی داعش ډلې شاوخوا دوې اوونۍ وړاندې د وسلهوالو طالبانو تر حاکمیت لاندې سیمې نه یو کوچی د لسګونو پسونو سره وتښتول او بیا د وسلهوالو طالبانو له غبرګون سره مخ شو.
د هغه پر خبره، طالبانو يې په بدل کې بیا د داعشیانو له سیمې ۹ کوچیان وتښتول.
هغه وايي، چې دغه کوچیان يې له بیک سر، خانقاه، ترکمن اولدی سیمې تښتولي او بیا يې د جوزجان درزاب ولسوالۍ په بزغالهخور کلي کې د خپل حاکمیت لاندې سیمې ته لیږدولي دي.
حشر وايي، چې د وسلهوالو طالبانو او داعش ډلې پلویانو ترمنځ خپلمنځي نښتې د درېيو اونیو راهیسې زیاتې شوې دي او د دوی له امله زیاتو ملکي وګړو ته زیان رسیږي.
په همدې حال کې د جوزجان د والي ویاند محمد رضا غفوري بیا دغه پېښه نه تایدوي او نه يې هم ردوي، خو وايي چې پهدې وروستیو کې د طالبانو او داعش ډلې ترمنځ خپلمنځي اختلافات زیات شوي، چې حتا نښتې يې هم سره کړې دي.
د ویلو ده، چې پهدې اړه وسلهوالو طالبانو او داعش ډلې څه نه دي ویلي.
