د میدان وردګو سیمه ییز چارواکي وایي، چې سلګونه وسله والو طالبانو پر مرکز میدانښاراو نرخ ولسوالیو کې د حزب اسلامي پر مرکزونو بریدونه کړي دي.
د میدان وردګو د والي ویاند عبدالرحمان منګل سلام وطندار ته وویل، چې دغو بریدونو او جکړو ۳ ساعته دوام وکړ او اوسمهال جګړه دریدلې ده.
منګل زیاتوي، چې په دغو بریدونو کې د حقاني ډلې یو قوماندان یوسف په ګډون ۱۰ وسله وال طالبان وژل شوي او ۱۲ نورټپیان شوي دي.
د میدان وردګو د والي ویاند زیاتوي، چې وسله والو طالبانو غوښتل د افغان حکومت او حزب اسلامي ترمنځ د سولې خبرې ګډې وډې کړي.
هغه وایي، کله چې په سیمه کې د حزب اسلامي پر مرکزونو بریدونه وشول افغان ځواکونو له حزب اسلامي ډلې ملاتړ وکړ او په سیمه کې يې د طالبانو پرضد تصفیوي عملیات پيل کړي دي.
د ویلو ده، چې له حزب اسلامي او افغان حکومت ترمنځ د سولې خبرو اترو وروسته دا لومړی ځل دی، چې د حکومت مخالفې ډلې وسله والو طالبانو او حزب اسلامي ترمنځ وسله واله نښته کيږي.
تېره پنجشنبه د افغان حکومت او حزب اسلامي مشر ګلبدین حکمتیار ترمنځ د سولې خبرې وروستۍ شوې او دواړو لوریو د سولې تړون لاسلیک کړ.
په دې اړه وسله والو طالبانو او حزب اسلامي له خوا تر اوسه څه نه دي ویل شوي.
