د میدان وردکو ولایت د پوهنې چارواکي وايي، چې طالبانو د یاد ولایت په سیداباد ولسوالۍ کې یو دیني دارالحفاظ تړلی دی.
د یاد ولایت د پوهنې رئیس فضل الرحمن طارق وویل، دغه دارالحفاظ د طالبانو له خوا له تېرو درېیو ورځو راهیسې تړل شوی دی.
نوموړي زیاته کړه، دغه دارالحفاظ د جمال الدین وردک په نوم د سیداباد ولسوالۍ په اونخی درې سیمې کې پروت دی.
طارق زیاتوي، په یاد دارالحفاظ کې شاوخوا د قران کریم سلو تنو حافضانو او یو شمېر نورو زده کوونکو دیني زده کړې کولې.
د میدان وردکو والي حیات الله حیات د دیني مرکزونو تړل په ځانګړې ډول د روژې په مبارکه میاشت کې د اسلامي او افغاني ارزښتونو خلاف کار یاد کړ.
حیات د سیمې له مخورو او دیني عالمانو څخه وغوښتل ترڅو دیني ارزښتونو ته په پام سره چاته اجازه ور نه کړي، چې د دوی په سیمو کې دیني مدرسې د زده کوونکو پر مخ وتړي.
د پوهنې ریاست چارواکو د طالبانو له خوا د یاد دارالحفاظ د تړلو د لامل په اړه څه ونه ویل.
خو یاده دې وي، چې دغه دارالحفاظ له دې مخکې هم د طالبانو له خوا په دې موخه تړل شوی و، چې دغه دارالحفاظ ته د حکومت له خوا اعاشه او اباته ورکول کیږي.
د ویلو ده، چې د یاد دارالحفاظ په اړه تراوسه طالب وسله وال څه نه دي ویلي.
