وسله والو طالبانو د ملي اردو د یو اسیر سرتېري پلار او د ترور مېړه یې ورته وژلي دي.
د سرپل ولایت ځايي مسوولین وايي، دا پېښه تېره ورځ د دې ولایت په علف سفید سیمه کې رامنځته شوې ده.
د سرپل د والي ویاند ذبیح الله اماني سلام وطندار ته وویل، دا سرتېری د سرپل په کوهستانات ولسوالۍ کې له طالبانو سره اسیر دی.
اماني وايي، د دې سرتېري پلار او د ترور مېړه یې د نوموړي لیدلو ته د سمنګانو ولایت له روی دواب ولسوالۍ هلته ورغلي وو.
د والي ویاند وویل، چې دا کسان د بېرته راتګ پرمهال د طالبانو د یوې ډلې له خوا ووژل شول.
دی وايي، یاد سرتېری دوه کاله مخکې د کوهستانات ولسوالۍ د سقوط په وخت کې طالبانو ونیولو او تراوسه ورسره اسیر دی.
د سرپل امنیې قوماندان خلیل الله دستیار هم دغه پېښه تایید کړې ده.
وسله والو طالبانو تراوسه په دې اړه څه نه دي ولي.
