طالب ویاند ذبیحالله مجاهد تېره شپه رسنیو ته په لېږلې خبرپاڼه کې ویلي دي چې د میدان وردګو ولایت په ځېنو سیمو کې د وسلهوالو طالبانو لهخوا د دولت پر وړاندې نظامي عملیات روان دي له کبله یې ټول ټرانسپورټي شرکتونه باید مسافر کابل ته ونه لېږدوي او نه يې هم له کابله ـ کندهار ته ولېږدوي.
د خبرپاڼې په حواله که هر شرکت سرغړاوی وکړي مسوولیت یې خپل دی. په خبرپاڼه کي راغلي دي دا کار يې د ملکي خلکو د خوندیتوب لهپاره کړی دی.
په کندهار کې د میرویس نیکه ټرانسپورټي شرکت استازي حاجي دوستمحمد سلاموطندار ته وویل، د شپې ناوخته امنیتي مسوولانو خبر ورکړ چي مسافر کابل، هرات او نورو ولایتونو ته ونه لېږدوي.
د ده په خبره، دوی ته د دې لارې د تړل کېدا په اړه څه نهدي ویل شوي.
نوموړی وايي، هره ورځ يې له ۲۰۰ زیات کسان کابل ته لېږدي او اوس یې هم ټکټونه ویشلي؛ خو د تګ اجازه نهلري.
د کندهار د والي ویاند داود احمدي وايي، تراوسه په دې اړه معلومات نهلري. دغهراز د کندهار د امنیې قوماندانۍ ویاند دراني، د پرلپسې اړیکو سره ـ سره ځواب ورنهکړ.
د زابل د والي ویاند ګلاسلام سیال وايي، تراوسه هېڅ موټر نه د کابل او نه هم د کندهار لهخوا تللی دی.
د ده په خبره، پرون طالبانو ټرانسپورټي شرکتونو ته ویلي چې د نامعلوم وخت پورې دې مسافر نه لېږدوي.
په کندهار کې په سلګونو بند مسافر د لارې له بندېدو شکایت کوي. دوی وايي، ناروغان، سپینږیري او ښځې ورسره دي؛ خو لاره بنده ده.
