د هېواد د نورو ولایتونو په څېر کونړ کې هم د ځنګلونو پرې کولو او قاچاق ستونزه جدي او مخنیوي یې حکومت ته لوی سرخوږی جوړ کړیدی.
تازه ـ تازه د دې ولایت د کرنې ریاست په هلو ـ ځلو کونړ کې اتیا قومي شوراګانې جوړې شوي چې په رضاکارانه توګه به د پخوانیو او زړو ځنګلونو پرې کولو د مخنیوي تر څنګ د نویو احیاکېدونکیو ځنګلونو ساتنه هم کوي.
دغو قومي شوراګانو نن سهار مرکز اسداباد کې د یوې غونډې پر مهال حکومت سره د یو هوکړهلیک لاسلیکولو پر مهال ژمنه وکړه چې د ځنګلونو د ساتنې په برخه کې به جدي هڅې وکړي.
عبدالعزیز او بیدارحاجي د اسمار او پېجدرې قومي مخورو او د یادو شوراګانو غړیو یاده کړه، که حکومت خپلې کړې ژمنې عملي کړي؛ دوی یې هم ملاتړ کوي.
دوی د ځنګلونو د پرې کولو په تړاو د قومي پرېکړو غوڅه پرېکړه ګټوره بولي او وايي چې د قومونو خبره ځکه زوروه وي چې ځانګړې تړې لري او پرېکنده عمل کوي.
د کونړ د کرنې ریاست د معلوماتو لهمخې، د دې ولایت ځنګلونه د هېواد ۲۵ سلنه جوړوي چې د ولسواکۍ نظام له رامنځته کېدو راوروسته څوو کلونو کې د کونړ له پاتې شویو ځنګلونو یې هم ۳۰سلنه په ناقانونه ډول له وهنې وروسته نورو ولایتونو او حتا بهرنیو هېوادونو ته هم قاچاق شويدي.
د کونړ ځېنې قومي مشران وايي، د ځنګلونو په پرې کولو او قاچاق کې تر ډېره حکومتي چارواکي او زورواکي لاس لري.
د کونړ د کرنې رییس انجینیر انعامالله ساپی وايي، د حکومت د څار او ولسي ملاتړ پهواسطه تر ډېره اوس دې ولایت کې د ځنګلونو پرې کول او قاچاق یو څه کم شوی؛ خو په خبره یې، یوازې د حکومت له حاکمیت بهر سیمو کې وهل کېږي.
هاخوا د کونړ والي عبدالستار میرزکوال وايي هڅه کوي چې ولسمشرمحمد اشرف غني او د زراعت وزیر ته قناعت ورکړي چې له دې شوراګانو ځېنې کسان د ځنګلونو د ساتنې لهپاره د شنې قطعې په شکل مقرر کړي.
والي وايي، د کومې قومي شوراګانو په ساحه کې که د نویو احیاکېدونکیو ځنګلونه ۳۰ سلنه تخریب شول یا د پخوانیو سمه ساتنه ونه شوه؛ نو د اړوندې شورا غړي به څارنوالۍ ته ور وپېژني.
