د غزني ولایت د رسنیو دفتر د یوې خبرپاڼې په خپرولو سره تایید کړې ده چې اوس هم د ګیلان ولسوالۍ سره په پوله د جاغوري ولسوالۍ پر پوستو د طالبانو بریدونه روان دي. د دوی په خبره، طالبانو له بېګا راهیسې د غزني په جاغوري ولسوالۍ برید پيل کړی چې ۳ سرتېرې یې وژلي او ۵ نور یې ټپیان کړي.
خبرپاڼه لیکي، د طالبانو پهدې برید کې د جاغوري د محلي پولیسو قوماندان حبیبالله ټپي شویدی.
په خبرپاڼې کې د طالبانو او ملکيانو د مرګوژبلې په اړه بېخبري ښودل شوېده.
په ورته وخت کې دغزني ولایتي شورا غړي خالقداد اکبري بیا سلام وطندار ته وویل چې د طالبانو له لوري پر حوتقول، علف زار او داوود سیمو بریدونه چې په داوود سیمه کې یې پرمختګ کړی او په دوو نورو سیمو پر شاتنبول شويدي.
د جاغوري ولسوال ظفر شریف هم وایي، طالبانو د خلکو کورونو کې مورچې نیولې او یو شمېر محلي ځواکونه یې وژلي.
د غزني د والي ویاند احمدخان سیرت هم وایي سیمې ته ځواکونه لېږل شوي؛ خو د خلکو په کورنو کې د طالبانو پټېدو د امنیتي ځواکونو عملیات ستونزمن کړيدي.
طالبانو تراوسه پهدې اړه څه نهدي ویلي.
